G’n oplossing om dodelike haai-aanvalle te keer

Die pragtige Tweede Strand van die skilderagtige vakansieoord Port St. Johns in die Oos-Kaap is straks die gevaarlikste stukkie kuslyn ter wêreld weens die voorkoms van dodelike haaiaanvalle in dié seegebied.

Op Kersdag verlede jaar het haaie by dié gewilde strand die sewende slagoffer die afgelope vyf jaar geëis toe Liyo Sibili (22) van Ntsimbini, ’n dorpie 35 km van Port St. Johns af, doodgebyt is.

Geremy Cliff, navorsingshoof van die KwaZulu-Natalse (KZN) Haairaad, sê die gebied is buitengewoon gevaarlik.

Volgens hom sterf gemiddeld een uit elke ses mense wat deur haaie aangeval word.

Vir Port St. Johns is dit nou sewe uit sewe. Hier is baie meer sterftes weens verdrinking, maar die haaiaanvalle hier is buitengewoon dodelik.

“Dis jammer ons het nog nie ’n oplos-sing gevind nie. As daar iets was wat ons kon doen om die aanvalle te stop, sou ons.”

Mike Gatke, wat vroeër ’n branderryskool hier bedryf het, sê haai-aanvalle in Port St. Johns is ’n reuse-probleem.

“Haai-aanvalle gebeur oral, maar nie so erg soos hier nie. Die afge- lope vier jaar was hier ses noodlottige aanvalle – twee in een jaar. Dis nie toevallig nie.”

Die Mzimvuburivier wat die oseaan by Port St. Johns se Eerste Strand binnestroom, is ’n broeiplek vir die gevaarlike en aggressiewe Zambezi-haaie, volgens navorsing van die KwaZulu-Natalse Haaie-raad.

Spanne van die raad het vanjaar onder meer die Zambezi-, grootwit- en skeurtandhaaie in die oseaan, asook die Zambezi’s in die rivier, gemerk.

Luidens ’n verslag van die raad aan die departement van omgewingsake verlede jaar sal oplossings duur wees en die omgewing skend.

“In dié stadium van die navorsingsprojek het ons nog nie ’n eenvoudige oplossing vir die probleem gevind nie,” sê Cliff.

Luidens die verslag sal ’n getypoel die strand se ontspanningswaarde verbeter, maar nie van veel waarde wees vir goeie swemmers of branderplankryers nie.

Dit sal ook baie duur wees om te bou.