G’n ‘sluwe seks’ toe hul in badkamer kuier
2012-09-17 06:03
- Artikelopsies
- Deel
- Kry Rapport op
Eduan Roos in Johannesburg
Daar was geen “sluwe seks” tussen die SuperSport-regisseur en die Bloemfonteinse vrou wat ná ’n Curriebeker-wedstryd in ’n badkamer vir gestremdes in die Vrystaat-stadion betrap is nie.
Maar, erken Juliet Lupton, die vrou midde-in dié herrie, dit was “dwaas” van haar om saam met ’n man – anders as haar kêrel – na dié badkamer te verdwyn.
André Knipe (48), ’n boer en Lupton se vriend van die afgelope anderhalfjaar, het reeds in die landdroshof in dié stad verskyn op aanklag van aanranding.
Hy het glo Saterdagaand Jacques van Schalkwyk so erg geslaan en geskop dat hy sy bewussyn verloor het.
Van Schalkwyk was die regisseur van die TV-uitsending van die wedstryd tussen die Cheetahs en die Westelike Provinsie. Sy blaas moes die afgelope week in die Rosepark-hospitaal in Bloemfontein geheg word nadat dit tydens dié onderonsie geskeur het.
Volgens Lupton ken sy en Van Schalkwyk mekaar reeds die afgelope 29 jaar.
“Ons het feitlik saam grootgeword en het ’n ruk lank uitgegaan, maar ek het seker tien jaar laas iets van hom gehoor,” het sy aan Rapport gesê.
“Ek en nóg ’n vriend het Jacques ná die wedstryd toevallig voor die badkamers raakgeloop en aan die gesels geraak.”
Volgens Lupton het haar ander vriend ná ’n ruk geloop.
“Ek en Jacques kon mekaar nie ordentlik hoor tussen al die mense nie.
“Ek het hom aan sy arm by die badkamer ingesleep, waar dit stiller was,” het sy gesê.
“Hy was nog besig om my te vertel dat hy intussen getroud is en pragtige kinders het, toe André daar inkom.”
Volgens Lupton was Knipe “van sy kop af van bekommernis”.
“Hy en Jacques ken mekaar glad nie en André het gedink ek het iets oorgekom of was teen my sin in die badkamer,” het Lupton gesê.
“Daar was geen sluwe seks of enigiets van dié aard nie. Dit was bloot twee ou pêlle wat ingehaal het.”
Volgens Lupton, wat as plaasbestuurder vir Knipe werk, is hy “nie ’n monster nie”.
“André is nie die bakleierige of die jaloerse soort nie en hoewel ons almal ’n paar drankies gehad het tydens die rugby, was hy beslis ook nie dronk nie.
“Hy is net beskermend oor my en ek kan verstaan dit was baie dwaas van my om saam met Jacques in ’n badkamer in te gaan.
“Ek was aanvanklik krapperig oor die voorval, maar ek gaan by André staan. Hy is my ou beer en ons sal nie toelaat dat dit ons verhouding vernietig nie.”
Volgens Lupton het sy en Van Schalkwyk se vrou, Aletta, reeds “oor koffie” oor die voorval gepraat.
“Sy’s ’n pragtige mens en ek glo sy verstaan nou wat werklik gebeur het.”
* Van Schalkwyk het aan Rapport gesê sy huwelik “is nie in die gedrang nie”.
“My vrou weet wat gebeur het. Ek is aangerand sonder dat ek hom (Knipe) enigsins uitgelok het of dat daar ’n woordewisseling was,” het Van Schalkwyk gesê.
“Dit was glad nie ’n seksuele ding nie en hoewel ek nou net wil aangaan met my lewe, gaan hy boet.”
Van Schalkwyk het reeds aan verskeie gewilde TV-programme gewerk, waaronder die rugbygeselsprogram Oor die kole met die oud-Bokke Kobus Wiese en Toks van der Linde.
Marius Bruwer, Van Schalkwyk se prokureur, het by navraag bevestig ’n siviele eis van “honderdduisende rande” gaan teen Knipe ingestel word.