Groep buitelandse sendelinge by natuurwonder beroof
2012-07-28 23:56
’n Groep van 11 buitelanders, van wie die meeste bejaardes is, is die afgelope week naby een van Suid-Afrika se bekendste natuurwonders deur drie mans van in die twintig beroof.
Volgens Gerhardt Mynhardt, bestuurder van die Hole in the Wall-vakansieoord in die Oos-Kaap, het die groep Donderdag omstreeks 12:00 op die strand gestap en foto’s geneem.
Hulle is van Amerika, Swede en Duitsland en doen hier sendingwerk.
“Ek was by my huis toe ek skielik ’n geraas en skietery hoor.
“Toe ek buitentoe gaan om te kyk wat gebeur, het ons plaaslike bevelvoerder my gekontak om te sê daar is pas ’n groep toeriste op die strand beroof,” sê Mynhardt.
Hy het sy verkyker gegryp en van ’n koppie af, wat oor die strand en die Mpakorivier uitkyk, die rowers dopgehou.
Die drie rowers het glo minute vroeër op die groep toegesak en aangedring op hul handsakke, rugsakke, elektroniese ware en kameras.
Mynhardt sê een van die sendingwerkers, ’n Amerikaanse vrou van in die sestig, het geweier om haar handsak te oorhandig.
“Een van die rowers het twee skote in die lug afgevuur en toe sy wapen teen haar voorkop gedruk.
“Sy was vreesbevange en het dadelik haar handsak oorhandig.”
’n Groep kinders, wat besig was om vir kreef te duik, het glo gesien wat gebeur en gehardloop om hulp te ontbied.
“Die drie ouens het terug oor die rivier gehardloop en in ’n hut op die oorkantste koppie gaan skuil.
“Ek het heeltyd met die polisie oor my selfoon gepraat en toe die polisiehelikopter opdaag, het ek hulle gaan wys waar die verdagtes wegkruip.”
Die hut was leeg en die rowers se klere was al wat die polisie in die hut gevind het.
Hulle het vermoedelik verklee om makliker te kon ontsnap.
“Die polisie se reaksie was baie goed, want daar is ’n hengse klomp lede ontplooi om die ouens vas te trek.”
Verskeie lede van die omgewing se honde-, berede en misdaadvoorkomingseenheid het die gebied ure lank gefynkam.
Mynhardt het omstreeks 22:15 dieselfde aand ’n oproep van ’n polisiebevelvoerder ontvang wat gesê het twee van die verdagtes is in hegtenis geneem.
Die meeste van die gesteelde goedere is gevind.
“Ons waarsku toeriste altyd om nie met waardevolle goedere rond te loop nie en om dit eerder in hul kamers toe te sluit, al gebeur daar nie gereeld sulke voorvalle hier nie,” sê Mynhardt.
Volgens hom was daar sowat ’n jaar gelede ’n soortgelyke voorval.