Hillary Clinton op pad na SA om bande te versterk
2012-07-28 23:56
- Artikelopsies
- Deel
- Kry Rapport op
Hillary Rodham Clinton, die Amerikaanse buitelandse minister, kom kuier volgende week om bilaterale bande met Suid-Afrika nóg verder te verstewig.
Die departement van internasionale betrekkinge en samewerking het Donderdag aangekondig Clinton kom van 4 tot 7 Augustus. Die Amerikaanse ambassade in Pretoria het teen Vrydagaand nog nie ’n vaste reisplan vir haar besoek gehad nie.
Clinton en adj.pres. Kgalema Motlanthe het as vernaamste gaste die afgelope week in Washington met die opening van die 19de Internasionale Vigskongres ’n verhoog gedeel. Die aankondiging van haar besoek is ná afloop van die kongres gedoen.
Rapport kon vasstel dat Clinton voorlopig volgende Sondag in Johannesburg sal land en dan twee dae later na Kaapstad sal vertrek.
Clinton was drie jaar gelede in Suid-Afrika as deel van ’n amptelike besoek aan ’n groep Afrika-lande.
Die afgelope twee weke was die burgeroorlog in Sirië hoog op die agenda van die Verenigde Nasies se Veiligheidsraad waarin Amerika (as permanente lid) én Suid-Afrika dien. Amerika het sanksies ondersteun, terwyl Suid-Afrika buite stemming gebly het. Rusland en China het dit egter geveto.