Hy kry WVK-geld danksy berig

Danksy ’n berig in Rapport het ’n pa besef hy kan geregtig wees op slagoffervergoeding van R30 000 wat deur die Waarheid-en-versoeningskommissie (WVK) aan sy oorlede seun toegewys is.

Mnr. Gert Teko Gotyana (54) se seun, mnr. Itumeleng Ernest Kojane, is in 1994 ernstig gewond toe ’n AWB-lid op hom geskiet het.

Gotyana van Hertzogville in die Vrystaat sê sy seun het verkies om sy van op ’n ander manier te spel.

Gotyana sê iemand in die dorp het verlede jaar in ’n Rapport-berig gelees die departement van justisie soek na sy seun rakende onbetaalde slagoffervergoeding.

Die persoon het die berig vir ’n werknemer gegee om dit op sy beurt vir Gotyana te neem. Gotyana het met die berig in die hand na die polisiekantoor in Hertzogville geloop.

Polisiebeamptes het Rapport gekontak, waarna Gotyana met die departement in kontak gebring is.

Gotyana sê amptenare het gevra dat hy dokumentasie oor Kojane se ma, wat oorlede is, aan hulle stuur.

Gotyana het nie ’n heeltydse werk nie.

Weens gesondheidsprobleme doen hy net af en toe ligte tuinwerk.

Sou hy die R30?000 ontvang, wil hy ’n grafsteen op sy seun se graf in Hertzogville oprig.

Luidens die WVK se finale verslag was Kojane ’n ANC-ondersteuner wat in ’n optog in 1994 gewond is toe ’n AWB-lid voor die landdroshof in Hertzogville op hom geskiet het.

Kojane was toe 15 jaar oud.

Gotyana sê sy seun het in 2004 weens onverwante omstandighede selfmoord gepleeg.

* Kojane is een van 21 769 mense wat volgens die WVK op vergoeding geregtig sou wees. Altesame 16 837 van hulle, insluitende Kojane, het wel om vergoeding aansoek gedoen.

Mnr. Tlali Tlali, woordvoerder van die departement van justisie, het gesê uitbetalings is reeds aan 16 300 begunstigdes gedoen. Van die oorblywende 537 moet 434 nog opgespoor word, asook die naasbestaandes van 103 wat reeds gesterf het.