Hy wil onthou word as die een wat implimenteer, sê Motlanthe

Adj.pres. Kgalema Motlanthe sal pres. Jacob Zuma net as ANC-leier in Mangaung uitdaag as ANC-takke en nié strydende faksies nie, hom benoem.

Motlanthe sê só in die boek, Kgalema Motlanthe, A Political Biography deur Ebrahim Harvey, wat Donderdagaand met groot fanfare by die Universiteit van die Witwatersrand bekendgestel is.

Honderde ondersteuners en nuuskieriges het die Groot Saal op dié kampus te midde van ’n elektriese atmosfeer volgepak.

Senior ANC-leiers en -strydrosse soos Trevor Manuel, Mathews Phosa, Tokyo Sexwale, adv. George Bizos en Ahmed Kathrada was saam met Motlanthe se familielede en vriende teenwoordig.

Gwede Mantashe, die ANC se sekretaris-generaal, was een van die sprekers, terwyl die adjunkleier van die ANC-jeugliga, Ronald Lamola, ook gesig gewys het. Die jeugliga steun Motlanthe amptelik vir die ANC-presidentskap.

’n Groep jeugliga-lede het vóór en tydens die verrigtinge kliphard liedere ter ondersteuning van Motlanthe, “Ons President”, en die uitgeskopte jeugleier, Julius Malema, gesing.

Die seremoniemeester het telkens gesukkel om ’n einde aan die dreunsang te bring.

Hulle het hul hande gerol, soos wanneer toeskouers wil hê ’n sokkerspeler moet vervang word en wat nou die handgebaar is vir diegene wat wil hê Motlanthe moet vir Zuma vervang. Dié gebaar het sporadies voortgeduur terwyl Mantashe en Motlanthe die gehoor toegespreek het.

Motlanthe het hieroor gesê: “Ek praat nie oor plekname nie omdat ek kan sien julle is vasgevang in die geografiese naam van Mangaung. Daar is belangriker dinge in Mangaung as net die ANC se verkiesingskongres.”

Motlanthe het gesê het hy hoop die boek moedig debat aan.

Hy wil hê daar moet eendag op sy grafsteen geskryf word: “Ander het voorstelle gemaak, maar hy het dit geïmplementeer”.

Met dié het die applous weer uitgebars en is die hande driftig in die lug gerol.