Nuwe Idols SA
2012-09-29 23:27
Christine van der Westhuizen
“Khaya! Khaya!” dreunsing die gehoor nog voordat die laaste twee deelnemers in vanjaar se Idols SA, Khaya Mthethwa (24) en Melissa Alison (23), op die verhoog verskyn vir die opname van die program Vrydagaand in die Mosaïek Teatro in Fairland, Johannesburg.
Dis Idols SA se agtste seisoen, maar dié kompetisie het, ondanks baie talentvolle deelnemers, nog nie ’n swart wenner opgelewer nie. Sal die nederige Khaya van Durban die kroon dra? Die gehoor is telkens op hul voete wanneer hy sing.
Of het die mooie Melissa van Port Elizabeth tog ’n kans?
Sy is ’n baie energieke sanger en lewer telkens ’n kragtoer.
Dié twee het klaar gegee wat hulle kan. Nou hang dit van hul aanhangers af om te bepaal wie stap weg met die titel, die platekontrak en die R500 000.
Hier is ’n voorsmakie van waarna aanhangers in vandag se program (om 17:30 op M-Net en Mzansi Magic) kan uitsien: ’n verskyning deur die Grammy-bekroonde Ciara as gasbeoordelaar; die bekendstelling van Khaya en Melissa se splinternuwe, oorspronklike snitte; die Drakensberg-seunskoor wat as agtergrondsangers optree; asook die bekendmaking van die vyf wenners van die Samsung-kompetisie.
Vir Khaya was Idols ’n leerskool. “Daar is geen ander kompetisie soos hierdie in Afrika nie. Dit was ’n ongelooflike reis,” sê hy.
Vir Melissa was dit ’n “emosionele wipwarit”.
“Dit was ’n fantastiese uitdaging; ek het soveel van myself geleer,” sê sy.
Die beoordelaar Gareth Cliff sê hy is dankbaar die beoordelaars hoef nie oor ’n wenner te besluit nie, want dit is ’n baie moeilike keuse.
Stem vir jou Idols-wenner: SMS die nommer 08 vir Khaya en 07 vir Melissa na 37400. Jy kan nog tot môre om 22:00 stem. Besoek http://idolssa.dstv.com vir meer inligting.