‘Informante klik graag op regses’
2012-12-22 23:58
Die terreurplanne van regse ekstremiste kom selde tot uitvoering omdat waardevolle inligting oor dié groepe se bedrywighede so gereeld aan intelligensiedienste uitgelap word.
“Daar is geweldig baie informante en infiltreerders wat bereid is om inligting oor verregses se bedrywighede teen ’n prys aan intelligensiedienste te verskaf,” sê dr. Piet Croucamp, politieke ontleder en dosent aan die Universiteit van Johannesburg.
Rapport het kenners genader oor die gevaar – of gebrek daaraan – wat verregse terreurgroepe vir gewone Suid-Afrikaners én politieke teikens inhou.
Volgens Croucamp saai dié infiltreerders wantroue en onenigheid in verregse organisasies.
Dit dwing hulle om kort-kort te herorganiseer en nuwe splintergroepe te stig.
“Regse groepe het ’n lae militêre kapasiteit en word boonop gekenmerk deur ’n gebrek aan konsensus en strategie.”
Volgens dr. Hamadziripi Tamukamoyo van die Instituut vir Sekerheidstudie (ISS) vind min Suid-Afrikaners aanklank by verregse organisasies omdat sulke organisasies se uitgangspunte ekstreem, esoteries en dikwels onsamehangend is.
“Die intelligensie-owerhede moet hulle nogtans fyn dophou, want mens wil nie ’n situasie hê waar enkele individue met vuurwapens rondhardloop en chaos saai nie. Dit is veral kommerwekkend dat die vier verdagtes glo mortiere bekom het.”
Hy het verwys na vier regses wat in hegtenis geneem is nadat hulle glo saamgesweer het om die ANC-leierskorps in Bloemfontein om die lewe te bring.
Groepe soos dié is meestal swak georganiseer en amateuragtig, meen Tamukamoyo.
“Daar is geen sprake van ’n verenigde verregse beweging in Suid-Afrika nie, maar eerder verskeie klein en versplinterde groepe wat allermins breë steun geniet,” sê Tamukamoyo.
Dr. Theo de Jager, visepresident van Agri SA, glo die aanname dat die landbougemeenskap ’n vrugbare teelaarde vir regse ekstremiste bied, is foutief.
“Ons verwerp die suggestie dat verregse aktiwiteite noodwendig ’n element in die landboubedryf is.”