Inhegtenisname kom ná forensiese toets-uitslae

Die uitslag van forensiese toetse het daartoe gelei dat die polisie gister ’n 16-jarige leerling oor die skokmoorde op die Steenkamp-gesin van Griekwastad in hegtenis geneem is.

Volksblad verneem kruit is op die klere van die seun gevind en ook sy vingerafdrukke op die twee wapens wat vermoedelik in die skietery gebruik is.

Die polisie het op die uitslag van die forensiese toetse gewag voordat ’n inhegtenisneming kon plaasvind.

Die feit dat dit nou gebeur het, dui daarop dat dié toetse hom waarskynlik met die skietdood van Deon en Christel Steenkamp en hul dogter, Marthella, op 6 April op hul plaas Naauwhoek, sowat 9km buite die dorp, verbind.

Bloed kan op klere agterbly, al is dit gewas. Kruit uit ’n vuurwapen kan van ’n mens se vel gewas word, maar stukkies daarvan brand op materiaal vas, indien dit daarop beland, is aan Volksblad gesê.

’n Ingeligte het gister gesê die Kinderwet bepaal dat indien so ’n jeugdige in hegtenis geneem word, moet hy deur ’n maatskaplike werker getoets word om te bepaal of hy toerekeningsvatbaar is.

Die maatskaplike werker moet dan ’n aanbeveling doen of hy in ’n plek van veiligheid of ’n gevangenis aangehou, of onder die sorg van ’n voog vrygelaat word, voordat hy in die hof verskyn.

Die Nasionale Vervolgingsgesag (NVG) het vandeesmaand gesê die besluit oor vervolging in dié moorde sal geneem word op grond van die getuienis wat die polisie ingesamel het. “Die bewyse moet waterdig wees om suksesvolle vervolging te verseker.”