Jack se bek is te vuil vir Juanita
2010-09-18 21:45
- Artikelopsies
- Deel
- Kry Rapport op
Die sangeres Juanita du Plessis sou nie gemaklik gevoel het daarmee om die verhoog by Huisgenoot se Skouspel te deel met die vuilbek-kletsrymer Jack Parow nie.
Dít blyk uit “’n informele gesprek” wat Doepie du Plessis, Juanita se man en bestuurder, glo met die organiseerders gevoer het.
En Jack het in sy gewone matroostaal gesê hoe hý daaroor voel…
Juanita en Jack is genooi om by Skouspel op te tree. Maar Jack is later deur die Skouspel-organiseerders aan die program onttrek.
Willem Breytenbach van Skouspel sê: “Dit het aan die lig gekom Parow is reeds bespreek by Aardklop (in Potchefstroom), wat met Skouspel se vertonings (in Sun City) sou bots.”
Hy ontken gerugte dat Jack uitgeskop is omdat Juanita nie saam met hom wou optree nie.
Ook Doepie ontken dat Juanita gedreig het om haar aan Skouspel te onttrek. Maar hy sê hulle het tydens “’n informele gesprek met Huisgenoot” hul kommer oor Jack uitgespreek.
“Dit gaan nie werk as ons die Onse Vader sing en dan tree Parow op nie… Dit sou ongemaklik wees as Parow in dieselfde produksie is,” sê Doepie.
“As Christene is dit vir ons ongemaklik en onvanpas om ’n verhoog te deel met iemand wat godslasterlike uitlatings maak.”
Breytenbach sê hý het nie met Juanita se bestuurspan gepraat nie.
En Jack?
“Ek laat my nie vertel dat Juanita nog nooit in haar lewe die woord ‘f*k’ gebruik het nie. Dis f****n onregverdig om my te judge… Dis k*k styl.”
Jack sê hy wou graag by Skouspel optree. “Ek sou die vloekwoorde vervang het. Soos, pleks van ‘f*k’ sou ek ‘demmit’ sê.”
Hy sê hy sou maklik by Aardklop én Skouspel kon optree. Ironies is dat Juanita en Jack wel albei by Aardklop gaan optree.
Breytenbach sê Juanita sal in Huisgenoot se tent by Aardklop optree voordat die Skouspel-repetisies begin.