Jansen staan vas teen ANC

Hy gaan nêrens nie.

Hierdie onverbiddelike standpunt van prof. Jonathan Jansen, rektor van die Universiteit van die Vrystaat, het gister vir nog olie op die vuur gesorg op ’n reeds erg verdeelde kampus wat na aan breekpunt is.

Me. Mary Metcalfe, direkteur-generaal van die departement van hoër onderwys en opleiding, is ewe onverbiddelik en het gistermiddag aan Rapport gesê daar moet geen kortpaaie vir die Reitz-4 wees nie. “Hulle moet bewys hul berou is opreg.”

Metcalfe en Jansen was gistermiddag laat nog in gesprek met mekaar en die gevoel is Jansen moet voor môre iets doen om die krisis op sy kampus te ontlont.

Grootskaalse protes uit ANC- en studente-geledere word in Bloemfontein verwag wanneer die Reitz-4 môre in die landdroshof verskyn.

Terwyl daar druk uit regeringskringe en Cosatu op Jansen uitgeoefen word, skop hy vas: “Ek staan by wat ek gedoen het. Ek gaan nie bedank óf my besluit herroep nie,” het hy aan City Press gesê.

“Mense moenie geraas met getalle verwar nie. Dit het niks met buitestanders te doen nie. Dit is die universiteitsraad wat besluit wie aangestel óf afgedank word.”

Metcalfe, regterhand van dr. Blade Nzimande, sê weer: “Die reg moet sy gang gaan met die vier studente. Dit is klinies anders as die universiteit se besluit om hulle weer toe laat, want dit word nie op ’n emosionele besluit gegrond nie.

“Prof. Jansen is ’n bekwame persoon, maar daar kan nie kortpaaie gevat word nie. Hulle is individueel verantwoordelik vir hul optrede.”

Metcalfe het Woensdagaand ’n brief aan Jansen gestuur en uitgevaar oor sy besluit om die vier manstudente van die Reitz-koshuis te vergewe ná hul walgvideo waarin koshuis-skoonmakers verneder is.

“Nét die gekrenkte kan vergewe. Geen ander vergoeding het betekenis nie tensy ’n verskoning aangebied én aanvaar word. In die afwesigheid van ’n verskoning kan geldelike vergoeding as ’n belediging beskou word?…

“Is die regte dissiplinêre prosesse van die Universiteit van die Vrystaat gevolg? Indien nie, watter implikasies hou dit in vir enige ander student wat oor die tou trap? Is dit net wangedrag binne ’n institusionele kultuur wat vergewe sal word? Is daar ander studente geskors wat rede mag hê tot soortgelyke vergifnis? Watter presedent skep dit vir toekomstige dissiplinêre sake?”

Metcalfe vra ook vrae oor Jansen sy bestuurstyl. Sy wil weet watter bestuurstrukture deel was van die besluit en indien daar ’n verbreking van beleid was, wie met hom saamgestem het.

“Ons stem saam dat die UV die vraag moet vra wat dit moontlik gemaak het vir so ’n gruweldaad om in die eerste plek gepleeg te word.

“Ons is nie oortuig daarvan dat die institusionele vergifnis sal help om dié vraag te beantwoord nie,” lui die brief.

Jansen het sy besluit verdedig om nie studenteverteenwoordigers en vakbonde van personeellede te raadpleeg nie. Hy sê die universiteit­senaat besluit oor toelating, skorsing en hertoelating.

- Rapport