Julius dalk ook oor opstokery vervolg

Die Valke ondersoek ook klagtes van opstokery en aanhitsing tot geweld teen ­Julius Malema, geskorste ANC-jeugleier.

Malema het die afgelope week op aanklagte van geldwassery in die hof op Polokwane verskyn. Die saak word op 30?November voortgesit.

Adv. Anton Ackermann SC van die Valke, wat die ondersoek na die opstoking en aanhitsing van oproer teen Malema lei, het skriftelik te kenne gegee daar is prima facie-getuienis om Malema weens dié klagte te vervolg.

Die klagte kom ná sy uitlatings by ’n vergadering met ontevrede soldate by ’n militêre basis naby Lenasia, suid van Johannesburg, twee weke gelede en ’n saamtrek van mynwerkers vroeër vandeesmaand.

Nou wag die nasionale vervolgingsgesag (NVG) nog net op ’n dossier van die Valke voordat besluit word oor Malema se vervolging. Die regsterm opruiery of opstokery is laas in 1979 gebruik toe 11 lede van die Soweto Students’ Representative Council skuldig bevind is aan terrorisme en opstokery en tronkstraf opgelê is.

Opstokery is ’n misdaad wat op die mag en gesag van die staat gerig is met die doel om dit uit te tart, uit te daag, te ondermyn of aan te val.

Maar Pierre de Vos, regskenner, meen dit sal hoogs ongewoon wees om Malema weens opstokery aan te kla en sal verklap hoe desperaat die regering is om hom stil te maak.

“As hulle hom gaan aankla, sal dit wys hoe paranoïes hulle oor hom is. Klagte van opruiery is ’n mynveld en moet liefs vermy word.”

Sy skerpste kritiek teen dié klag, sê De Vos, is dat die owerhede dit kan gebruik om spraakvryheid te smoor.

Die Valke bestudeer glo nou Malema se toespraak by sy vergadering met ontevrede soldate waarin hy na Suid-Afrika verwys het as ’n piesangrepubliek en gesê het pres. Jacob Zuma is “betrokke by ander dinge”. Hy het ook die president ’n diktator genoem. Mense het slegs hul stem en denke om “dié barbaarse regime” te beveg, het Malema gesê.

Die departement van verdediging het Malema gestriem en sy toespraak tot aanhitsing verklaar wat die land se veiligheid bedreig.

Die vakbond Solidariteit het strafregtelike klagte teen Malema ingedien nadat hy by die Aurora-myn in Springs aan die mynwerkers gesê het: “Ons sal dié myne onregeerbaar maak totdat die Boere na die tafel kom.”

Malema se prokureur het nie gereageer op versoeke om kommentaar nie.