'Jy sal sterf soos Bin Laden'

Hy het ’n Moslem-man glo doodgeskop, maar twee polisielede het hom nie in hegtenis geneem nie omdat hulle nie aan diens was nie.

Mohamed Faiyaz Kazi (25), ’n winkeleienaar van Ventersdorp, en sy vriend Anser Mahmood (33) is Maandag omstreeks 17:00 voor ’n kitskosrestaurant in Magaliesburg aangerand ná ’n onderonsie met twee mans.

Hulle was in dié toeristedorp vir sake en het by die Chicken Licken stilgehou vir kos.

Kazi is herhaaldelik in die gesig geskop en het enkele ure later aan erge breinbloeding beswyk.

Mahmood is so erg geslaan dat hy glo steeds sukkel om te sien.

Volgens Hashimbhay Motara, Kazi se skoonpa, het die mans sy skoonseun gespot oor sy baard en hoed toe hy en Mahmood by die winkel instap.

“Hulle het hom ‘Bin Laden’ en ‘f****n swartbaard’ genoem en aan sy baard getrek,” het Motara aan Rapport gesê.

“Toe Mohamed wou weet wat hulle verkeerd gedoen het, het een van die mans hom ’n ‘bliksemse k****e’ en die ander k-woord genoem en gesê dít wat met Bin Laden gebeur het, sal ook met hom (Kazi) gebeur.”

Osama bin Laden, die voormalige Al Kaïda-leier, is in Mei verlede jaar deur ’n Amerikaanse taakspan in Pakistan om die lewe gebring.

’n Chicken Licken-werknemer het aan Rapport gesê al vier die mans is gevra om die restaurant te verlaat, waarna Kazi en Mahmood buite die restaurant aangeval is.

Trevor Buthelezi, ’n kelner by ’n nabygeleë onderneming, het aan Rapport gesê “’n groot, wit man van oor 100 kg” het die houe en skoppe bykans 20 minute lank op Kazi en Mahmood laat neerreën.

“Hy (Kazi) het op die grond gelê terwyl sy vriend (Mahmood) op sy hurke gesit het met baie bloed aan sy gesig,” sê Buthelezi.

“Die ou het amper 20 minute lank aangehou om hom te skop en te slaan, maar het hom elke nou en dan gelos om weer die ander ou (Mahmood) te slaan.

“Daar het ’n skare mense begin saamdrom, maar almal was te bang om te help,” sê Buthelezi.

“Iemand het die polisie gebel, maar voor hulle daar opgedaag het, het ’n ander motoris stilgehou en die man van hom (Kazi) afgetrek.”

Volgens Buthelezi wou ’n erg beseerde Kazi weet waarom die polisie nie die verdagtes arresteer nie.

“Die lede het gesê hulle mag nie, want hulle is van diens af en het vir hom gesê om ’n klag by die polisiekantoor in te dien.”

Dié beamptes was glo reeds weg voordat die verdagtes in hul motor (’n wit Tata met die registrasienommer YHL 295 GP) geklim het.

* Volgens Motara sukkel die Kazi-gesin en veral Mohamed se vrou, Sajidah, om sy dood te verwerk.

“Ons kan nie verstaan hoe iemand so wreed vermoor kan word net omdat hy anders lyk nie,” sê Motara.

SAPD: ‘Kazi wou nie klag indien’

Die polisie kon nie Mohamed Faiyaz Kazi se vermeende moordenaar arresteer nie, omdat Kazi geweier het om ’n aanrandingsklag in te dien – en níé omdat twee polisiebeamptes van diens af was nie.

Só het brig. Neville Malila, Gautengse polisiewoordvoerder, gister aan Rapport gesê.

Kazi is Dinsdag in ’n Potchefstroomse hospitaal dood nadat hy en ’n vriend Anser Mahmood die vorige dag voor ’n kitskosrestaurant in Magaliesburg aangerand is.

Volgens Malila het dié aanranding nie in die teenwoordigheid van die twee Magaliesburgse polisiebeamptes, wat eers later op die toneel was, plaasgevind nie.

“Die verdagte was nog in die omgewing teen die tyd dat die beamptes daar opgedaag het, maar hulle was nie noodwendig meer op die toneel self nie,” het Malila gesê.

“Die beamptes het vir hulle (Kazi en Mahmood) gevra of hulle ’n klag wil indien, maar hulle wou nie en daarom kon ons niemand arresteer nie.”

Volgens hom is die polisie sedertdien besig met “’n grootskaalse soektog” na een van die verdagtes – ’n 33-jarige man van Rustenburg.

“Ons was reeds by sy huis én werkplek, maar kon hom nêrens vind nie,” het Malila gesê.

**NUUTSTE VERWIKKELINGE

BEELD berig vanoggend (Maandag): Twee mans van Rustenburg in Noordwes is gearresteer weens die moord op Mohammed Fayaz Kazi (26) wat verlede Maandag so erg aangerand is dat hy aan breinbloeding gesterf het.

Die een verdagte (27) is laat Saterdagaand gearresteer. Die tweede (33) het homself gisteroggend in die teenwoordigheid van sy prokureur by die Magaliesburg-polisiestasie oorgegee, het brig. Neville Malila, polisiewoordvoerder, gesê.

Die twee verskyn vandag in die Krugersdorp-landdroshof op aanklagte van moord en aanranding met die opset om ernstig te beseer.


“Ons vermoed hy het gevlug, maar ons is vol vertroue dat ons hom binnekort sal vastrek.”