Kanaal kóók vanjaar met dié reekse
2013-01-20 01:25
- Artikelopsies
- Deel
- Kry Rapport op
Wie is die kokkedoor onder Afrikaanssprekendes in die kookkuns?
Kykers kan hulle vanjaar verlustig in die wedywering tussen Afrikaanse kosmakers om as kokkedoor-van-die-kombuis gekroon te word in Kokkedoor, kykNET se nuwe kookkompetisiereeks van 13 episodes.
Dit is ruweg geskoei op M-Net se MasterChef.
Die reeks word op die Karoodorp Prins Albert geskiet en begin in April.
Oudisies is die afgelope naweek in Johannesburg gehou.
Die beoordelaars is Hetta van Deventer-Terblanche, ’n sjef, en Nic van Wyk, ook ’n sjef en restaurant-eienaar.
Nico Nel, kykNET-woordvoerder, sê dié kanaal sal vanjaar elke Donderdagaand ’n fliekaand hê.
Onlangse Afrikaanse treffers soos Semi-Soet en Liefling is op die spyskaart vir die jaar.
Die kanaal het onlangs ook die tienerreeks Liefste Kayla bekend gestel.
Net soos die karakter Hannah Montana in die gewilde Amerikaanse TV-reeks is “Kayla” ’n jong tienermeisie wat nog altyd ’n sangeres wou word.
Sy verken die lewe saam met haar beste vriende: die maltrap Nadia en die buurseun, Dolf.
Zandile Nkonyeni, SAUK-woordvoerder, sê hulle beplan ook nuwe reekse, maar wil nie nou al die aap uit die mou laat nie.
E-tv se woordvoerder het nie op Rapport se vrae oor hul planne vir 2013 gereageer nie.