Karpryse skrik nie LUR’e af nie
2012-08-18 23:49
- Artikelopsies
- Deel
- Kry Rapport op
Te midde van die handboekskandaal en swak dienslewering in Limpopo koop LUR’e van dié provinsie steeds luukse voertuie van miljoene rande aan.
Pinky Kekana, wat verlede jaar LUR vir paaie en vervoer was toe haar departement en vier ander weens swak bestuur onder administrasie geplaas is, het vandeesmaand vir haar die 2012-model van die Mercedes- Benz ML 500 4MATIC teen R1 miljoen aangeskaf. Sy is tans die LUR vir ekonomiese ontwikkeling en omgewingsake.
Die enjin van Kekana se agt maande oue BMW X5 is in Februarie, toe sy nog LUR vir paaie en vervoer was, “ekonomies onherstelbaar” beskadig.
Dit is herstel teen R250 000, maar toe ruil sy dié voertuig in vir ’n Merc E350 waarvoor meer as R600 000 opgedok is.
Wisani Shilenge, Kekana se woordvoerder, het gesê Kekana kon nie die VW Touareg 3.0 TDI (2009-model) van Pitsi Moloto, voormalige LUR vir ekonomiese ontwikkeling en omgewingsake, gebruik nie “omdat dit die voorgeskrewe lewensverwagting (120 000 km) oorskry het en gedurig probleme gee”.
Ook Clifford Motsepe, LUR vir plaaslike regering en behuising, ry deesdae in ’n Mercedes-Benz ML, pleks van die Q7 van sy voorganger, Soviet Lekganyane.
Tseng Diale, woordvoerder van Motsepe se departement, het gesê: “LUR’e ry so baie rond en hul motors moet elke dan en wan vervang word.”
Dr. Norman Mabasa, LUR vir gesondheid, het ’n nuwe vuurwa nadat hy in Maart ingehuldig is.
Hy kon nie die departement se Audi Q7 gebruik nie omdat dit 120 000 km oorskry het.
Jacob Marule, Limpopo se LUR vir landbou, spog met ’n nuwe Lexus RX350, ’n “skamele R600 000” uit die belastingbetaler se sak, het Mandisa Mashego, departementele woordvoerder, gesê.
Die DA se Desiree van der Walt sê: “Die ministeriële handleiding laat LUR’e toe om voertuie te vervang, maar om dit te doen in ’n provinsie wat onder administrasie is, is absurd.”