Kenners wys wie onder misdaad ly...ras of klas?

In die nadraai van die Brandon Huntley-asielaansoek het ’n woordestryd tussen kenners uitgebreek oor waarom wit mense onder misdaad deurloop, en of hulle om rasredes geteiken word.

Huntley het sy asielaansoek gegrond op die bewering dat hy spesifiek ’n misdaadteiken in Suid-Afrika is omdat hy wit is en swart mense hulle deur misdaad op wit mense wreek.

Die jongste hoofstuk in die sage het begin toe 142 van Suid-Afrika se voorste akademici ’n brief aan die Kanadese regering onderteken het waarin hulle sê swart mense loop groter gevaar om misdaadslagoffers te wees as wit mense.

Nou het die ontleder James Myburgh op die webblad Politicsweb peilings van 1997, 1999 en 2007 geplaas wat toon dat wit en Indiërrespondente persentasiegewys meer onder misdaad deurgeloop het as swart en bruin respondente.

In 2007 het ’n Markinor-peiling byvoorbeeld getoon 22% van Indiër-respondente, 20% van wit respondente, 9% van swart respondente en 9% van bruin respondente was al misdaadslagoffers.

Dieselfde jaar se bevindings in ’n soortgelyke peiling deur die Instituut vir Sekerheidstudies toon 32% Indiër-respondente, 29% van wittes, 25% van bruines en 22% van swartes was self al misdaadslagoffers.

Die kern van Myburgh se artikel is eintlik dat die akademici iets onderteken het wat hulle waarskynlik nie empiries nagevors het nie, maar hy vra ook die vraag: “Word sommige rasgroepe dalk wel geteiken? En hou dit verband met rasgebaseerde stellings deur ANC-leiers teen wit mense?”

Me. Vanessa Barolsky, hoofnavorser by die RGN, meen daar is baie verskillende peilings, en die mening dat swart mense meer onder misdaad deurloop, word deur onder meer polisiestatistieke en die Mediese Navorsings- raad se sterftestatistieke aangetoon.

Daarvolgens is geweldmisdaad soos aanranding en moord die hoogste in stedelike townships, hoewel middelklasbuurte (oorwegend wit) meer deurloop onder diefstal, roof en gewapende roof, want daar is meer om te steel.

Sy wys daarop dat middelklasbuurte tans vinnig integreer en dat alle inwoners, ongeag ras, dieselfde misdaadprobleem ervaar.

Die misdaadkenner mnr. Michael O’Donovan het aan Rapport gesê klas en verstedeliking speel ’n belangriker rol as ras in Suid-Afrikaanse misdaad.

“Die armste Suid-Afrikaners is landelike swart mense wat woon in gemeenskappe waar almal mekaar ken en waar gevestigde norme geld. Daar is die minste misdaad.

“Met verstedeliking verval daardie norme, en mens vind die hoogste voorkoms van geweldsmisdaad in townships, hoewel dit elders ook voorkom.

“Hoërinkomste-groepe val ander misdaad soos diefstal en roof erg ten prooi, maar dis ’n kwessie van klas, nie ras nie,” het hy aangevoer.

- Rapport