Kweek porno nou ook jong verkragters?

Sy onthou spesifiek een 12-jarige seun wat ’n 5-jarige dogtertjie verkrag het.

“Hy het volgens die dogtertjie allerlei snaakse posisies met haar probeer.

“Toe ek hom vra waar hy dit geleer het, toe sê hy vir my hy het dit op TV gesien,” vertel me. Zelda Hattingh, voormalige inspekteur in die polisie se eenheid vir gesinsgeweld, kinderbeskerming en seksuele oortredings.

Ook ander seuns in die Kwa-Zulu-Natalse dorp waar die voorval plaasgevind het, het dié 5-jarige meisie verkrag, dikwels met soortgelyke stories.

In die debat die afgelope week oor MultiChoice se aankondiging dat hulle die beeldsending van ’n kanaal met volwasse inhoud oorweeg, is statistieke deur sowel die voor- as teenstanders van pornografie aangehaal.

Maar Hattingh se stem is een van ’n groep wat nog nie gehoor is nie – beraders wat eerstehands by jeugdige seksoortreders (self nog kinders) gehoor het hoe hulle deur TV-pornografie aangevuur is om met seks te eksperimenteer.

Sy rits die voorvalle af. Drie seuns van agt en nege jaar oud is byvoorbeeld deur haar oor hul premature seksuele gedrag ondervra.

“Hulle het spesifiek in hul verklarings gesê dat hulle die seks op TV gesien het en dit wou probeer.”

En nog: “Ek het een keer ’n kind van sewe jaar gekry wat ’n sesjarige probeer verkrag het. Hy sê heel onskuldig vir jou hy het dit op TV gesien.

“Hoe straf jy so iemand?”

Hattingh is nie die enigste wat so ’n tendens opmerk nie.

’n Maatskaplike werker wat in plakkerskampe rondom Pretoria werk en nie sy naam kan noem nie weens die aard van sy werk, vertel hoewel dit nie deur statistici bevestig is nie, sien hulle wel anekdotiese getuienis van ’n skakel tussen seksuele geweld deur minderjariges en die geredelike beskikbaarheid van pornografie. Hy onthou ’n saak waar kinders van 14 en 15 jaar oud ander onsedelik aangerand het.

“Hulle het gesê hulle het dit êrens gesien en toe begin eksperimenteer.

“Ons sien ’n toename in seksuele geweld soos wat pornografie op selfone en elders meer beskikbaar raak.”

Indien daar maatreëls is om kinders van pornografie weg te hou, behoort dit nie kinders tot seks-misdade aan te vuur nie, vertel me. Dumisile Nala, uitvoerende hoof van die beradingsdiens Childline.

Maar ongelukkig woon ’n enorme klomp Suid-Afrikaanse kinders in huise en gemeenskappe waar niemand ordentlik oor hulle toesig hou nie.

“Daar is soms kinders so jonk as agt of selfs vyf jaar wat onsedelik begin optree nadat hulle aan so iets blootgestel is.

“Hulle is so jonk dat jy hulle nie eens seksmisdadigers kan noem nie.

“Hoe gereeld hoor ons nie van jong seuns wat ander kinders verkrag nie.

“As ons dan in beradingsgroepe met hulle praat, sê hulle dat hulle tuis op pornografiese materiaal afgekom het en dit toe self wou probeer.”