Kyk mooi! Van Coke Kartel speel Keuzenkamp

Van hardebaard-rockmusiek tot Carike Keuzenkamp.

Aanhangers van die rockgroep Van Coke Kartel kon hul oë nie glo nie toe hulle hul musiekhelde gladgeskeer en opgedollie in “ou tannie-klere” in hul jongste musiekvideo sien. Kompleet met netjiese A-lynrompies, shoulder pads, sykouse, hoëhakskoene en frilletjie-bloese.

Die musiekvideo, Dis ’n land, is ’n sinspeling op Carike Keuzenkamp se gelyknamige treffer in die laat 1980’s. Dit herhaal enkele reëls van die oorspronklike lirieke, maar die res is bloubloed-Van Coke Kartel: “Dis ’n land van liefde vir drank” en “Dis ’n land van korrupsie en goddank” sing die voorsanger, Francois van Coke, met rooigeverfde lippe.

“Dit is iets heeltemal anders as wat ons al aangepak het,” sê Wynand Myburgh, baskitaarspeler van Van Coke Kartel. “Ons video’s is gewoonlik hard core, maar hierdie keer is ons omgepraat om iets anders te doen.

“Die tannie-van-die-80’s-idee was ietwat weird, maar op die ou end het ons baie pret gehad. Die feedback van ons fans is ook baie positief.”

En wat sal “tannie” Carike sê?

“Nee wat, sy is self ’n performer, ek dink sy sal waardering daarvoor hê.”

Die manne moes al om 06:30 aanmeld (om vooraf gepoeier en ge-paint te word) en die opname was eers 15 uur later klaar.

Die hoëhakskoene was glo die ongemaklikste deel van die hele ervaring, “maar ons het dit tussendeur die shoots uitgetrek”.

Hoewel Keuzenkamp die video nog nie gesien het nie, vind sy die idee van vier rockmusikante uitgedos in “tannieklere” nogal snaaks. “Ons lag vandag self oor hoe ons destyds aangetrek het,” sê dié gewilde sangeres wat al sedert 1967 optree en steeds op die verhoog te sien is.

“Ek dink dit is goed dat die jongklomp belangstel in die musiek van die tagtigs.”

Oor die leen van haar lirieke sê sy “kunstenaars leen mos maar so by mekaar”. “Ek self het Suikerbossie eenkeer so aangepas.”