Lees Bybel met groen bril of word vernietig
2009-10-24 21:08
- Artikelopsies
- Deel
- Kry Rapport op
’n Afgetrede insektekenner het ’n byenes in die teologie oopgekrap met ’n lesing waarin hy vra dat die Bybel nuut gelees moet word met die huidige ekologiese krisis in gedagte.
Prof. Erik Holm, bekende entomoloog, het die laaste weke op ’n NG sinode, by gemeentes, in die Kerkbodeen by die Nuwe Hervormers ’n pleidooi gelewer wat baie in kerkkringe laat gons.
Die wêreld stuur op ’n mensgemaakte ramp af waarin alle lewe binnekort vernietig kan word, sê Holm. Een van die min maniere waarop dié ramp vermy kan word, is as mense leer om die Bybel deur ’n groen bril te lees.
“Baie van die ekologiese insigte wat ons nodig het om te oorleef is eintlik oeroue wyshede uit die Bybel, maar ons het dit misgekyk.”
Godsdienste fokus tradisioneel op mense eerder as die natuur. “Tot dusver was al die groot religieë verbasend stil (oor die dreigende ekologiese ramp weens aardverhitting).”
In die era van toenemende sekularisasie ontstaan ’n groen etiek nou, een wat nie gaan om mense se interaksies nie, maar oor respek vir die natuurlike omgewing. In Berlyn is net 30% van die bevolking belydende Christene terwyl 99% glo in ’n groen etiek. “Die groen etiek is besig om die been onder alle gelowe uit te trek.”
Die Christelike etiek moet nou ook herdink word. “Die kerk het nog ’n funksie, maar hy kan dit net vervul as hy hom van die dogma van die verlede losmaak en ophou om hom tot ’n intermenslike etiek te beperk.”
Volgens Holm vereis dit dat mense God se opdrag aan Adam om aan die diere name te gee, moet lees as ’n opdrag om die natuurlike wêreld beter te leer ken. Hulle sal God se aanstelling van Adam as leenheer van die skepping moet herdink (“as jy iets van God leen, moet jy dit teruggee in dieselfde of ’n beter toestand as waarin jy dit gekry het”).
En hulle moet besef dat die Bybelse opdrag om vrugbaar te wees en “die wêreld te vul” erg oortree word (“ons het nie die aarde gevul nie, ons het sy drakrag vier keer oorskry”).
Hoewel die Ou Testament dikwels wreed oor mense berig, is dit poëties en filosofies oor die waarde van die natuurlike landskap en diere.
Holm meen as die kerk in dié gevaartyd relevant wil wees, moet hulle “die feite van die wetenskap in hul wyshede begin inbou. Die kerk gaan ’n intermenslike etiek moet uitbou tot iets wat werklik globaal is.”
- Rapport