Liefde, spanning, ’n rower en ’n laspos: dís als in Gé se fliek
2012-09-29 23:27
Christine van der Westhuizen
“Neem ’n goeie paar skeppies spanning, ’n bietjie liefde, ’n eksentrieke oujongnooi, ’n aantreklike held en heldin, amper net so ’n aantreklike rower en sy meisie en ’n laspos wat die wêreld moeilik maak – en jy het ’n genotvolle gesinsrolprent.”
Só word die Kavalier-rolprent Lokval in Venesië met Gé Korsten in die hoofrol in ’n koerantartikel in 1972 beskryf.
Dié klassieke Afrikaanse trefferfliek kry Rapport se lesers op Sondag 14 Oktober in DVD-formaat gratis saam met die koerant.
Lokval in Venesië handel oor Zelida (June Seymour), ’n eksentrieke oujongnooi, wie se juwele gesteel is. Sy en haar niggie gebruik die sakkevol versekeringsgeld wat uitbetaal is om ’n bootreis na die Mediterreense See te onderneem, heeltemal onbewus van ’n agterdogtige speurder (Gé Korsten), wat hom voordoen as ’n ambassadeur sodat hy hulle onder oë kan hou.
Intussen is die rower (Bob Riley), dié se mooi meisie (Linda Basson) én die gebuite juwele ook op die skip. Boonop is daar ’n weeskind-verstekeling (die kinderster Maudie Adendorff), wat sake verder deurmekaarkrap.
“My pa het sy eie waaghalstoertjies vir dié fliek gedoen,” vertel Linda Korsten. “Hy moes onder meer aan ’n tou teen die kant van die boot hang om deur ’n patryspoort te loer en ’n paar meter verder was die malende water. As hy geval het, sou die skroewe van die boot hom verbrysel het. Die kaptein van die skip het glo die bewerasie van vrees gehad.
“Hy moes ook in een van die stink Venesiese kanale swem terwyl ’n dooie kat, visblikkies, dooie voëltjies en nog allerhande aaklige dinge verby hom gedryf het. Hy en Bob Riley raak ook handgemeen, onder meer in ’n Venesiese glaswinkel, hoewel dié toneel in Kavalier se ateljee in Johannesburg geskiet is.”
Trevor Moses, argivaris van die Nasionale Rolprent-video-en-klankargief in Pretoria vertel: “Lokval in Venesië was Gé se voorlaaste fliek en is vyf jaar voor Netnou hoor die kinders verfilm.
“Waar het jy al gehoor ’n operaster soos Korsten sing ’n liedjie soos Ob-La-Di, Ob-La-Da!
“Die fliek is spesiaal vir Gé se aanhangers gemaak. Dit het ’n pragtige klankbaan met liedjies soos Liefling en O Sole Mio en die fotografie is puik.”
Die regisseur was Ivan Hall, wat later groot roem, plaaslik en oorsee, verwerf het met Kill & Kill Again, sy komiese fliek oor die Oosterse verweerkuns.
Lokval in Venesië word met die vergunning van kykNET se Silwerskermreeks aan Rapport-lesers verskaf.