Lindie: Die Heilige Gees werk met my
2012-07-23 05:52
- Artikelopsies
- Deel
- Kry Rapport op
“Dankie dat julle in my bly glo.”
Die aktrise Lindie Stander sê sy kry nou die hulp wat sy lankal moes gekry het.
Lindie, wat bekend is om haar rol as suster Elise Kruger in die kykNET-sepie Binneland, word tans in ’n kliniek in Gauteng behandel nadat sy sowat drie weke gelede probeer selfmoord pleeg het.
Sy het gister in haar eerste media-onderhoud sedert die selfmoordpoging aan Rapport gesê sy “raak elke dag net sterker”.
“Ek kan voel hoe die Heilige Gees met my begin werk.
“Ek kan dit nie regtig beskryf nie, maar ek kan ook nie stilbly daaroor nie.”
Lindie sê sy is tans redelik afgesonder, maar diep bewus van duisende mense se ondersteuning en liefde vir haar.
“Soveel het al gesê ek maak ’n verskil in hul lewe. Nou is dit juis dáárdie mense wat ’n verskil in my lewe maak.”
Lindie sê haar kop is reg en sy kies om rasioneel te dink.
“Die eerste week hier was baie moeilik. Ek is met goed in my lewe gekonfronteer wat ek gedink het uitgesorteer was.
“As ek oor twee weke uitkom, wil ek ’n verskil maak.”
Die gewilde aktrise sê sy weet sy hoef nie bang te wees vir die pad vorentoe nie.
“My lewe is in God se hande en Hy het ’n plan met my. Ek moes net eers in die donker dieptes gaan draai.”
Lindie beplan nou om ’n boek en ’n verhoogstuk te skryf.
“As daar een mens is vir wie ek nie kan ophou dankie sê nie, is dit Karen Meiring, kanaalhoof van kykNET.
“Sy het my hier ingekry (in die kliniek) en sy betaal hiervoor.”
Intussen reël Lindie se vriende konserte om haar mediese uitgawes te help betaal.
Marnette Meyer en haar dogter, Jacky Crafford, reël die eerste konsert vir 1 September op Dozi se plaas, Back to the Roots, buite Hartbeespoort.
Kunstenaars wat reeds genader is, sluit in Amanda Strydom, Pieter-Dirk Uys, Riaad Moosa, Wayne Mckay, Francois Toerien, Wynand en Chereé Strydom en die groep Adam.
Die Kaapse konsert se datum is nog nie bepaal nie.
Ernst Swart, publisiteitsbestuurder van Binneland, sê daar sal beslis van die sepie se akteurs by die konsert vir Lindie wees.
“Lindie is immers een van hulle,” sê hy.
Oor die kritiek op die vervaardigers omdat hulle haar rol uitgeskryf het, sê hy: “Die karakter word uitgeskryf ter wille van die aktrise sodat Lindie die nodige hulp kan kry.
“Elsje en Friedrich Stark (die vervaardigers van Binneland) was nog altyd net ondersteunend en goed vir die mense wat vir hulle werk.”