MXit-ontmoeting lei tot ontvoering
2009-12-12 22:15
’n Pretoriase meisie (14) is glo Donderdag ontvoer en in Potchefstroom aangehou totdat sy Vrydagnag omstreeks 23:20 ná ’n landwye soektog gevind is.
Danelle Brits was bedwelmd en getraumatiseerd toe private speurders, haar ma se lewensmaat en die ondersoekbeampte haar by ’n huis in Grimbeeckpark, Potchefstroom, gekry het.
“Mamma, as julle my nie (eergister) gekry het nie, sou julle nie. Hulle het gesê ons gaan vanaand in ’n ander plek bly, want anders gaan my ma my kry. En hy wil nie tronk toe gaan nie,” het Danelle gister vertel.
Sy is glo onder meer gedwing om vyf glase wyn vinnig af te sluk.
Die polisie het bevestig twee mans, onderskeidelik 37 en 35 jaar oud, word in Pretoria aangehou vir ondervraging.
Danelle het aan Rapport vertel sy het ’n man sowat ’n week gelede op die selfoonkletsnetwerk MXit ontmoet en foto’s uitgeruil.
Volgens me. Thelma Brits, haar ma, het dié man Danelle Donderdag omstreeks 11:30 na die Sinoville-inkopiesentrum?–?’n paar straatblokke van hul huis?– gelok.
Danelle het haar rapport by die Hoërskool ?Overkruin, ?waar sy vanjaar ’n gr. 8-leerling was, gaan haal en toe na die winkelsentrum gegaan.
Die man het glo vir Danelle gesê hy wil haar aan sy dogtertjie voorstel en sal haar dan weer gaan aflaai.
Die mans het egter met haar Potchefstroom toe gery en die SIM-kaarte van haar twee selfone uitgehaal.
Toe me. Brits by die huis kom, het sy in die buurt by mense waar haar dogter gewoonlik kuier, gevra of sy daar is, maar niemand het geweet waar sy is nie.
Sy het naarstiglik in die nabygeleë inkopiesentrums gesoek en die saak by die polisie aangegee toe navrae by hospitale ook niks opgelewer het nie.
Die familie het ook Dynamic Investigation Solutions genader.
Me. Cathrina Mahlangu, die familie se huiswerker, het die leidraad verskaf dat Danelle ’n missed call op haar selfoon gekry het voordat sy vort is.
Die familie het haar selfoonstate met die hulp van ’n landdros en aanklaer gekry en die nommer van waar sy gebel is, geïdentifiseer.
Die selfoonsein van dié nommer is gevolg tot in Potchefstroom.
Mnr. Johann Spies, ’n private speurder, het gesê hulle het haar en twee mans asook ’n klomp dwelms in ’n tuinwoonstel daar gekry.
Danelle is na die Montana-hospitaal in Pretoria geneem en die familie wag op die uitslae van ’n volledige mediese ondersoek.
- Rapport