Ma vertel hoe afknouery seun aftakel
2012-12-16 02:27
- Artikelopsies
- Deel
- Kry Rapport op
’n Ma van ’n afgeknoude kind vertel: Jacques* was die kleinste in sy gr. 7-klas.
Groter seuns het hom getreiter deur goed buite sy bereik vas te hou, sy hare te vryf of in die badkamers aanmerkings oor sy geslagsdele te maak.
’n Seun het op ’n keer opsetlik op sy voet geürineer.
Jacques het die personeel hiervan vertel, maar is aangesê om op te hou stories aandra en ’n sissie te wees en te leer om sy man te staan.
Hy het uit verdediging begin om poetse te bak en mense te terg.
Hy het ál meer in die moeilikheid gekom en sy skoolwerk het agteruitgegaan.
Op ’n keer het ’n onderwyseres hom in ’n klas vol kougomkouende kinders uitgesonder en moes hy kougom in sy hare druk.
Die klas het gelag, maar Jacques was in trane.
Ek en my man het ’n kenner geraadpleeg en met inligting oor hoe boeliegedrag aandag moet kry, die hoof gaan sien.
Die hoof het egter gevoel dis belangriker om oor Jacques se gedrag te praat.
Ek het met hom saamgestem dat dit skoorsoek is om gom op groter seuns se stoele te smeer en ’n padda in hul sportskoene te sit.
Maar ek het aan hom en die juffrou van die kougom-episode (waarvan die hoof nie geweet het nie) verduidelik hoe meer Jacques verneder word, hoe meer gaan hy negatief reageer.
Die volgende dag het die hoof aan die gr. 7’s gesê om op te hou om mekaar te boelie en dat hy nie weer stories van ouers wil hoor nie.
Jacques het ál stiller geword, ál meer in die moeilikheid beland, maer geword en met sy skoolwerk het dit vrot gegaan.
Hy wou niks doen nie.
Op ’n dag het hy by twee geleenthede sy humeur verloor toe ’n seun hom eers gepootjie het en later sy kleinboetie rondgestamp het.
By die tweede voorval het Jacques die seun met ’n knuckle duster geslaan.
Hy moes die res van die jaar detensie staan en mag nie op ’n skooltoer gegaan het nie.
Ons het Jacques die volgende jaar na ’n hoërskool in heeltemal ’n ander dorp gestuur.
Die koshuisvader hier is ’n ongelooflik wyse man wat vir Jacques gesê het hy wil hom leer ken soos hy is en wil nie van sy verlede weet nie.
* Skuilnaam