Man van Upington sterf in sel
2012-10-13 23:19
Die familie van ’n Noord-Kaapse man soek antwoorde nadat hy in polisie-aanhouding gesterf het.
’n Nadoodse ondersoek wys Edion Beukes (40), bekend as Ettienne, is verlede naweek aan onnatuurlike oorsake dood in die Rosedale-polisiekantoor in Upington. Hy het skedelbreuk en inwendige bloeding opgedoen.
Een van sy broers, wat sy lyk moes uitken, sê hoewel hy voor sy inhegtenisneming blakend gesond was, was sy tande uit, sy lyf was vol blou kolle en daar was bloed aan sy neus en ore.
Volgens Ettienne se broers, Riaan en Connie, het hy verlede Saterdagmiddag met sy bure in ’n woordewisseling betrokke geraak. Die bure het die polisie ontbied en Ettienne het kort daarna vrywillig met ’n polisiebeampte na die Rosedale-polisiekantoor gegaan.
Connie, die jongste broer, sê vriende van Ettienne het hom om 20:00 laat weet sy broer is toegesluit.
Toe Connie na die polisiekantoor is, kon hy nie met sy broer praat nie. Die beamptes aan diens het gesê hy kan sy broer die volgende oggend sien as hy vrygelaat word.
“Ek het hulle gevra wat die klagte teen Ettienne is en hulle het gesê het hy word aangekla vir ‘oorlaspleging’.”
Connie is daarna huis toe.
Die volgende oggend het die polisie Connie ingelig dat hulle sy broer se lyk in die polisiesel gekry het.
Volgens lt.kol. Moses Dlamini, woordvoerder van die onafhanklike polisie-ondersoekdirektoraat (Opod), is hul kantoor in Upington ingelig oor die sterfte. Hy sê daar word ondersoek ingestel na die omstandighede van Beukes se dood.