Man vas vir moord
2012-12-20 12:26
- Artikelopsies
- Deel
- Kry Rapport op
Ermelo. – Die man wat glo sy vrou se roggelgeluide oor die selfoon gehoor het nadat sy aangeval en keelaf gesny is, is weens vermeende aandadigheid aan die moord in hegtenis geneem.
Annemarie Birk, ’n musiekonderwyseres, is op 7 September, ’n dag ná haar 41ste verjaardag, keelaf gesny.
Lodewyk Jurgens Birk (38) is eergister omstreeks 20:30 by vriende se huis in Ermelo aangekeer.
Skaars vier uur vantevore het die polisie Mxolisi Malinga (27), die egpaar se tuinwerker, vasgetrek.
Malinga was ten tyde van sy arrestasie besig om ’n klaskamer by die Hoërskool Ermelo, dieselfde skool waar Annemarie ’n onderwyser was, te verf.
Die polisie het sowat ’n maand gelede Annemarie se selfoon, wat tydens die moord gesteel is, in ’n sloot naby die provinsiale hospitaal opgetel.
Die foon het blykbaar verskeie leidrade opgelewer wat die twee verdagtes na bewering met die moord verbind.
Kort ná die moord het Birk aan die polisie gesê sy vrou het hom by die werk gebel en net oor die foon geroggel. Hy het huis toe gejaag en haar bebloede lyk in die slaapkamer aangetref.
Die motief vir die moord is steeds duister, het die polisie in Ermelo gister gesê.
Beeld het destyds berig hoe Annemarie vermoor is.
Behalwe dat sy keelaf gesny is, is sy ook verskeie kere met ’n mes in die maag gesteek.
Hoewel daar geen teken van inbraak in die egpaar se huis was nie, was daar wel duidelike tekens van ’n verbete struweling tussen haar en haar moordenaars, het kapt. Carla Prinsloo, polisiewoordvoerder, gesê.
Kort voor haar moord het sy glo nog die hek van hul huis in Theronstraat vir haar man oopgemaak om werk toe te gaan.
Sy is kort daarna aangeval.
Sy het Birk glo gebel, maar by sy aankoms by die huis het hy in die hoofslaapkamer op sy vrou se lyk afgekom.
Sy was nog in haar pajamabostuk en broekie geklee en die klere wat sy die dag sou dra, het langs haar op die bed gelê.
Enkele dae ná die moord is Birk in die Denmar- psigiatriese hospitaal in Pretoria opgeneem nadat hy glo ’n senu-instorting gehad het.
“Mnr. Birk was van die eerste dag af ’n verdagte. Wat ook opsigtelik was, is die geweld waarmee die steekwonde toegedien is,” het ’n ingeligte na aan die ondersoek gister gesê.
“Die moord op Annemarie was ongenaakbaar en wreed en ons is net bly as iemand daarvoor aangekeer is,” het Bok Martins, skoolhoof, gister gesê.
Volgens hom was Annemarie ’n saggeaarde mens. Sy het nege jaar lank vir die skool gewerk.
Die twee verdagtes word aangehou en sal môre in die plaaslike landdroshof verskyn.
Klagte van moord, sameswering om te moor en roof met verswarende omstandighede word teen hulle ondersoek.