‘Mandela is in goeie luim’
2013-01-20 00:02
- Artikelopsies
- Deel
- Kry Rapport op
Dit gaan goed met oudpres. Nelson Mandela waar hy rus in sy huis in Houghton, Johannesburg, sê sy kleinseun Mandla Mandela.
Mandla het Madiba (94) Woensdag besoek.
Hy sê sy oupa was in ’n goeie luim en reageer goed op medikasie wat hy tuis ontvang.
Die oorvloed gebede en wense van beterskap wat van heinde en ver na die oudpresident gestroom het nadat hy verlede maand in die Pretoriase harthospitaal opgeneem is, het hom diep geraak, het Mandela glo aan Mandla gesê.
Madiba was amper ’n maand lank in die hospitaal waar hy vir galstene geopereer en vir ’n longinfeksie behandel is.
Volgens die presidensie het sy dokters gesê hy het goed herstel.
Dit was die langste wat Mandela in die hospitaal deurgebring het sedert sy vrylating uit die tronk op 11 Februarie 1990.
Mandla, wat graag sal wil sien dat sy oupa terugkeer na Qunu, “waar hy hoort”, het gesê Madiba moet self besluit wanneer hy na sy Oos-Kaapse heimat terugkeer.