Marikana: ‘Mense se smart uitgebuit vir eie gewin’

Politici soos Julius Malema wat hulle as die redders van mynwerkers in Marikana voorhou, buit die naasbestaandes van die oorledenes se smart uit vir politieke gewin.

So het Zwelinzima Vavi, hoofsekretaris van Cosatu, gister op ’n konferensie van die SA Mediese Vereniging se komitee vir dokters in die openbare sektor in Pretoria gesê.

Vavi het erken Cosatu is bekommerd oor splintervakbonde, soos Amcu by die Lonmin-myn, en die vakbondbedryf se voortbestaan.

Volgens hom kan Cosatu se nasionale konferensie in September, waar nuwe leiers gekies word, dié federasie “maak of breek”.

Cosatu beskou die fenomeen as só ernstig dat briewe in die komende week aan elke Cosatu-lid gestuur sal word om hulle oor die gevare van splintervakbonde te waarsku.

Volgens Vavi weier Cosatu om die Marikana-tragedie vir eie politieke gewin uit te buit.

“Ons gaan ook nie iemand daarvoor blameer nie, woede onder werkers stook of sentimente teen die regering en individue dryf sonder die feite nie.”

Vavi sê Cosatu gaan wag vir die bevindings van die geregtelike kommissie van ondersoek na die tragedie.

Vavi het erken splintervakbonde is een van Cosatu se grootste uitdagings.

“Dit is ’n georkestreerde aanval op Cosatu deur werkgewers en is hoogs problematies.

“Dit kan ons groot skade berokken omdat dit die lojaliteit van werkers verdeel,” het hy gesê.