Mev. Wêreld wil sy wees
2012-08-26 00:06
- Artikelopsies
- Deel
- Kry Rapport op
Suid-Afrika sou verlede naweek baie beter in die Mej. Wêreld-kompetisie gevaar het as Melinda Bam, Mej. Suid-Afrika, ’n wyser besluit geneem en daaraan deelgeneem het.
Só meen Mev. Suid-Afrika, Lynné de Jager (28).
De Jager glo ’n skoonheidskoningin moet elke geleentheid gebruik en die beste daarvan maak.
Bam het vroeër vanjaar opslae gemaak deur haar aan dié Mej. Wêreld-kompetisie te onttrek.
Sy het besluit om net op die Mej. Heelal-kompetisie te fokus en haar eerste prinses, Remona Moodley, het in háár plek Mej. Wêreld toe gegaan.
Maar Moodley kon verlede Saterdag nie die top-tien haal in China nie.
De Jager gaan Suid-Afrika eersdaags in die Mev. Wêreld-kompetisie verteenwoordig en Bam gaan later vanjaar aan die Mej. Heelal-kompetisie deelneem.
Die datum en gasheerland vir Mev. Wêreld (dis óf Rusland óf Amerika) word volgende week bekend gemaak wanneer Mev. Amerika gekroon word.
Daar is geen gebrek aan selfvertroue by dié pragtige swartkop nie.
“Ek gáán wen,” het De Jager die afgelope week aan Rapport gesê terwyl sy slaptjips by ’n Sandton-restaurant eet.
“Ek is nou besig met ’n strawwe eet-en-oefen-program. Ek is in my derde week van ’n program van 12 weke.”
Dis vir haar moeilik om nie haar daaglikse pakkie Smarties en Jelly Tots te kan eet nie. En sy’s lief vir pizza ook.
De Jager is in ’n tydperk van net nege maande deur ’n gewapende rooftog én ’n motorkaping.
Sy en haar man, Wilhelm, het vriende se huis in Pretoria opgepas toe sewe gewapende rowers hulle oorval.
Tydens die motorkaping was sy swanger.
“Ek het by ’n vriendin se pa se huis in Germiston stilgehou en ’n man het ’n pistool teen my kop gedruk. My vriendin het uit die kar gespring en toe skiet hy oor my kop op haar. Ek het so groot geskrik. Die volgende dag het die dokter vir my gesê ek het die baba verloor. Ek het baie gehuil.”
De Jager het vertel hoe katterig dit agter die skerms van die Mev. Suid-Afrika-kompetisie kan raak.
Een deelnemer het ’n keer aan De Jager gesê: “Jy sal nooit maer word nie; jou beenstruktuur is te groot.”
De Jager het gesê: “Ek het baie kalm gebly en gedink just smile and wave.”