Minki en Constant wys tande vir mekaar
2009-11-07 23:00
- Artikelopsies
- Deel
- Kry Rapport op
Die model Minki van der Westhuizen en haar man, Constant Visser, se egskeidingsdrama het nóg ’n lelike wending geneem.
Die twee se egskeiding is allesbehalwe gemoedelik.
Minki en haar ma het Dinsdag by die vervreemde egpaar se huis in Paradyskloof opgedaag en die huisraad in bokse begin pak en wegdra.
Constant het egter by die huis aangekom en gedreig om die polisie te bel as sy nie ophou nie.
Ingevolge die egskeidingsproses moet ’n inventaris van die huisraad eers opgemaak word om te bepaal hoe dit onder die twee verdeel moet word.
Minki het volgens vriende met niks behalwe haar klere in Constant se huis ingetrek toe hulle getroud is.
Constant het verlede week teenoor Rapport erken die Suid-Afrikaanse krieketkaptein, Graeme Smith, het ’n aandeel gehad in die verbrokkeling van sy huwelik.
“Minki se beheptheid met geld” het ook gehelp om hul huweliksbootjie te sink.
Die polisie se beheerkamer het bevestig dat hulle Dinsdag na Paradyskloof ontbied is, maar kon nie sê of dit die Vissers se woning was nie.
Constant het egter gister gesê die polisie was nie daar nie.
Minki het verlede naweek gedreig om Constant in die media swart te smeer.
Toe hy dreig om dieselfde te doen, het sy egter haar plan laat vaar.
“Die media moet maar geduldig wees.
“As sy of haar ma begin uitpraat, dan gaan ek ook my kans kry,” het Constant in ’n SMS aan Rapport geskryf.
“Ek is net ’n gewone mens wat met ’n bekende meisie getrou het – wat seer en ongelukkig is met sy keuse van die vrou met wie hy getrou het.”
Minki wou nie kommentaar lewer nie.
- Rapport