Moedige Reef verjaar in Disneyland
2012-09-22 23:15
- Artikelopsies
- Deel
- Kry Rapport op
Reef Carneson kon vir die eerste keer sy verjaardag geniet, kerse doodblaas en lekkergoed eet en dít nogal in Disneyland.
Reef, die Suid-Afrikaanse peuter wat in Amerika vir transplantaat-versus-gasheer-siekte behandel word, het Maandag vier geword.
Sy siekte spruit uit ’n beenmurgoorplanting nadat leukemie in 2009 by hom gediagnoseer is.
Toe Rapport verlede jaar in Oktober by Reef gaan kuier het, kon hy nie praat, self loop, sy hande gebruik of buite speel nie. Dit was kort voor sy vertrek na Amerika. Sy vel was oral gebars en teer, sy vuisies heeltyd gebal en hy is met ’n buis deur sy neus gevoed.
Maar nou is dit ’n heel ander storie, sê sy ouma Charmeon Carneson.
“Die verbetering is ongelooflik.”
Reef kan nou al ses woorde sê en kommunikeer verder deur na prentjies te wys. Nie net kan hy op sy eie staan nie, maar hy is nou ’n woelwater wat rondhardloop en speelgoed optel.
“Sy hande kan nog nie eens halfpad oop nie, maar hy kom mooi reg,” sê Charmeon.
Reef se dae bestaan uit spraak-, arbeids- en fisioterapie.
Hy kry ook binnekort gips aan sy arms en bene om sy hande te strek en sy bene reguit te maak.
“Maar hy is ’n bondeltjie energie. As hy te haastig is om sy woorde uit te spreek, babbel hy te lekker in baba-taal.”
Reef het Maandag sy verjaardag gevier saam met al sy gunsteling Disney-karakters en kon self lekkers eet.
“Reef sal vir die res van sy lewe transplantaat-versus-gasheer-siekte hê, maar sy lewensgehalte het in die laaste tien maande baie verbeter.”
Sy ouers, Lydia en Ryan, en sussie, Payten, is in Amerika met ’n mediese visum en word onderhou deur skenkings waarvan 99% volgens Charmeon uit Suid-Afrika kom.
“Die span agter Reef is ongelooflik. Ek dank God vir dié mense, want as dit nie vir hul onbaatsugtigheid was nie, sou Reef nie hier gewees het nie.”
Meer oor Reef by www.savebabyreef.com