Monopoly kraai koning

Monopoly is steeds bobaas onder bordspeletjies in Suid-Afrika.

Benewens dat dit pret is (mits jy uit die tronk kan bly) is dié en ander bordspeletjies byna so gesond vir jou kind as spinasie.

Volgens Leanne Lombard van Prima Toys in Johannesburg is Monopoly hul beste verkoper.

Daarna kom 10 Game Compendium, Rummikub Experience, Monopoly Millionaire, Rubik’s Cube, Twister Refresh, Fun on the Run Games, Jenga, Battle­ships en Twister.

Ook by Toys R Us verkoop Monopoly die meeste, sê Maurice Sacher, ’n mede-eienaar van Redgwoods, wat Toys R Us besit.

Hiernaas verkoop Twister en Trivial Pursuit die meeste.

Volgens Sacher vaar die verkope van die nuwe toevoeging tot bordspeletjies, Monopoly Millionaire, ook baie goed.

Behalwe dat dit groot pret is, het dié speletjies ook opvoedkundige waarde, sê Annemarie Bateman, ’n arbeidsterapeut van Roodepoort.

“Dit is belangrik dat kinders wat op pad skool toe is bordspeletjies speel, want dit kweek konsentrasievaardighede.

“Jy leer om te wag, om te deel, jy ontwikkel getalbegrip en jy leer kleure uitken.”

Bateman meen bordspeletjies help sosiale vaardighede kweek (wag jou beurt af) en help spelers om van vroeg af tussen reg en verkeerd te onderskei (moenie jou maatjie se Monopoly-geld steel nie).

Benewens kinderontwikkeling is dit selfs goed vir die gesin, as almal hulle natuurlik gedurende die spel gedra.

“As ’n gesin só saamspeel, besef hulle die waarde van dinge saam doen. Jy leer ken die ander mens beter. Jy besef wat sy of haar sterk punte is.

“Kinders besef ook hulle is deel van ’n span. En as jy ’n fout maak, moet jy leer hoe om dit te hanteer en hoe om dit reg te maak.”

Dit het ’n sielkundige invloed op kinders wanneer hulle saam met hul gesin hierdie speletjies speel, meen Bateman.

Hulle besef hulle is belangrik genoeg dat hul gesin tyd saam met hulle wil deurbring, sê Bateman.

“Kinders sien hoe ouers saamwerk en hoe hulle ’n situasie benader wanneer hulle nie die antwoord ken nie. Kinders sien dus hoe hul ouers in tye van ‘nie weet nie’ die saak hanteer.

“Kinders moenie eers wanneer hulle op skool is bordspeletjies begin speel nie, maar so vroeg moontlik.”

Antwoorde: 1. Monopoly 2. Dr. Black 3. Trivial Pursuit 4. Pictionary 5. 32 6. Tien