Moodley-aansoek misluk

Regter Joop Labuschagne meen Donovan Moodley (31) se “ware storie” agter die moord van me. Leigh Matthews is deurspek met onwaarskynlikhede en die desperate poging van ‘n man wat voel hoe die skoen knyp in sy huidige omstandighede.

Labuschagne het Woensdag in die hooggeregshof in Johannesburg Moodley se aansoek om sy skuldigbevinding aan me. Matthews se moord en menseroof en die afpersing van haar pa, Rob, tersyde gestel en sy aansoek om ‘n herverhoor afgekeur.

Moodley het oorspronklik skuld beken, maar het in dié aansoek beweer hy het gelieg omdat brig. Piet Byleveld, ondersoekbeampte in die saak, hom gedwing het om ’n bekentenis af te lê.

Hy het ook aangevoer die ondersoek was gedokter sodat niemand die “ware storie” sou hoor nie. Die waarheid is volgens Moodley dat drie dwelmsmouse hom gedreig het om by me. Matthews se ontvoering in 2004 by die Bond Universiteit in Sandton betrokke te raak en dat hy moes toekyk hoe een van hulle, slegs bekend as Jemba, haar doodgeskiet het.

“Hoekom sou die gevaarlike drie dwelmsmouse juis Moodley nader om hulle met ‘n ontvoering by te staan. Hoekom sou die drie mans me. Matthews voor Moodley doodmaak en hom eenvoudig vry laat? Met van dié feite kan ek net vind dat Moodley se weergawe oor die drie dwelmhandelaars onwaar is,” het Labuschagne gesê. -- BEELD