‘My ma was ons roos: Mooi binne en buite’
2012-09-09 01:11
Julian Jansen in Kleinmond
Die eienares van die Rossta-gastehuis in Kleinmond het met mening teruggeveg toe haar aanvaller(s) haar vroeg verlede Vrydag verwurg en haar lyk daarna in ’n bad met vermoedelik vuurwarm water gesit het.
Ingeligtes bestempel die moord op Christa Ross (59), ’n geliefde gemeenskapsmens van die dorp, as “wreed”.
Die lykskouing en verklarings van sekere mense het glo goeie leidrade aan die polisie verskaf.
Ross se half geklede lyk is net ná 11:00 in die badkamer van haar vierslaapkamer-gastehuis in Heuningkloof, Kleinmond, aangetref.
Dit was enkele ure nadat haar man, Rossie (61), na Johannesburg vertrek het.
Die egpaar, oorspronklik van Kimberley, het hulle in 2010 op die kusdorp gevestig.
Ross en drie gaste was in die gastehuis toe haar man om 03:45 na die lughawe vertrek het.
Hy is ’n mynkonsultant en sou ’n voorlegging in Johannesburg gaan doen.
Toe twee ander gaste om 11:00 by die gastehuis opdaag en niemand die voordeurklokkie beantwoord nie, het hulle Ross se man gekontak.
Hy het toe sy buurvrou, Anorina van Eeden, gebel, wat toe ondersoek ingestel het.
Ross se lyk is in die bad aangetref. Haar maroenkleurige BlackBerry, verloofring en ’n wit laken wat vermoedelik bloedspatsels op kan hê word uit die huis vermis.
Haar man het aan Rapport gesê dit was ’n groot skok toe hy in Johannesburg moes verneem sy vrou is vermoor.
Ds. Barry Lordan het eergister tydens Ross se roudiens in die NG kerk Kleinmond gesê sy woorde vir die Ross-familie in dié hartseer, ingewikkelde tyd is min.
Gerugte vlieg rond en daar is nog baie vrae vir die familie en vir Kleinmond. Dit is soos om deur ’n dowwe spieël te kyk, maar tyd sal die antwoorde bring.
Hy het gesê Ross se lewe was gekenmerk deur liefde vir almal.
Haar werk in talle verenigings, die laerskool en die tennisklub is geloof.
Haar broer, Sam Manefeldt, het in ’n emosionele huldeblyk staaltjies oor sy suster, wat tuis as Kwassie aangespreek is, vertel.
Ross se seun Ian het tydens sy bedankings gesê: “My ma was die roos in ons huis, mooi van binne en van buite.”
Hy het daarna ’n rooi roos aan sy pa gegee met die roerende woorde: “Ek gee die roos vir pa. Dit is my ma se hart. Kyk na haar, praat met haar.”
Hy het sy pa, wat deur die diens stil en strak voorgekom het, toe emosievol vasgegryp.
* Ao. November Filander, ’n polisiewoordvoerder, het gister gesê die ondersoek is in ’n sensitiewe stadium en die polisie kan geen kommentaar lewer nie.