My vyf jaar van werkhel met Terre’Blanche
2010-04-17 22:50
Toe Eugène Terre’Blanche op 11 Junie 2004 by die tronk uitgestap het, het hy verklaar dat hy nou nader aan sy Skepper is.
Maar mnr. John “Klaas” Mosegathebe, wat ná Terre’Blanche se vrylating vyf jaar vir hom gewerk het, het niks goeds oor die vermoorde AWB-leier te sê nie.
Hy sê Terre’Blanche het hom gereeld verneder en aangerand.
Mosegathebe (62) is halfblind en ’n selferkende alkoholis. Hy woon by sy suster in die Tshing-township buite Ventersdorp. Hy is werkloos en bring die meeste van sy tyd by die viswater deur, op soek na kos.
“Die enigste ding wat my oor Terre’Blanche se dood pla, is dat hy my nooit ten volle betaal het nie,” sê hy.
“Ek word só kwaad. Ek sukkel. Ek haat daai man. Hy was ’n slegte mens en ’n skelm.”
Die trane rol nou oor Mosegathebe se wange.
“Die laaste keer toe ek weggeloop het, het hy al my goed gevat – my potte, panne, slaapgoed en my Nokia-selfoon.”
Nog trane. “In die vyf jaar wat ek vir hom gewerk het, het hy net een keer my salaris betaal. Elke keer as ek daarvoor gevra het, raak hy kwaad. Dan moes ek hoor hy sal my later betaal,” sê Mosegathebe.
En wanneer hy gedrink het?…
“Dan het hy goed gesê soos ‘julle donnerse k*****s, ek gaan julle vrek maak en vir die honde gooi in die veld’.”
Hy beweer ook Terre’Blanche het hom gereeld mishandel.
“Hy het my voor die bors gegryp, gewurg en met ’n sweep bygekom. Sy lekkerste speletjie was om my op te tel langs sy perd, weg te galop en so in die galop skielik te los.”
Maar wanneer Terre’Blanche nugter was, “was hy soos ’n engeltjie”, sê Mosegathebe.
Hy het keer op keer weggeloop, en dan het Terre’Blanche hom gebel en gesmeek om terug te kom.
“Hy het my omgekoop. Hier is vir jou R20 – koop vir jou ’n doppie. Ek tel jou môre hier op. Daai soort van ding. Dan het ek maar teruggegaan.”
Oor die twee mense wat aangekla is weens die moord op Terre’Blanche sê Mosegathebe: “Daai twee mense het nie een skoene of broeke gehad nie. Terre’Blanche was te suinig en ek moes van my klere vir hulle gee.”
En dan sug hy: “As Terre’Blanche my nie drie maande gelede weggejaag het nie, dan sou hy nog gelewe het. Ek sou na hom gekyk het.”
- Rapport