Nádine sing in Chinees
2012-08-18 23:49
- Artikelopsies
- Deel
- Kry Rapport op
Voorheen was die pad wat sy die beste geken het die een na haar naaste Wimpy, sê die sangeres Nádine.
Deesdae is dié roete die een na die naaste Chinese ambassade.
Nádine het in Junie ses konserte in China gehou, waarna sy teruggevra is vir nóg twee konserte in Julie en Augustus.
Sy het nou voor gehore van tot 5 000 mense opgetree.
Die Chinese was so beïndruk deur die sangeres van treffers soos This Time I Know en I Will Be Strong dat hulle haar vir nóg 16 konserte voor Kersfees bespreek het.
“Ek sal seker nog so drie keer China toe gaan voor die einde van die jaar.”
Nádine sê die Chinese gehore raak baie opgewonde wanneer hulle liedjies hoor waarin sy hoë note sing. “Verder dink ek hulle hou van my soort musiek en my musiekstyl.”
Nádine sê sy doen baie moeite om die Chinese kultuur te verstaan en te respekteer.
Sy het selfs ’n liedjie in Mandaryn-Chinees geleer wat deel uitmaak van haar repertoire in China.
Nádine sê haar eerste optredes was baie stresvol, juis omdat sy geen verwysing na boerewors of rugby kan maak nie.
“Toe praat ek maar oor hul musiek en hul land.”
Sy het ook die omslag van haar album This Time I Know in Chinees laat druk en daar uitgereik.
“Die meeste Chinese praat nie eintlik Engels nie, so ek probeer met ’n paar Chinese woorde kommunikeer en verder gebruik ons ’n tolk.”
Sy werk tans aan ’n splinternuwe album.
“My prioriteit is nou om vir my eie mense iets te gee, so die Suid-Afrikaners sien en hoor die album voor die res van die wêreld.”
Haar Kaapse toer begin op 25 Augustus in Wellington.