Nou soek die hele land na Marius se maatjie
2012-08-26 00:06
- Artikelopsies
- Deel
- Kry Rapport op
“Soekloop was nog nooit maklik nie, maar gistergoed moet ook weer vandaggoed word sodat mens kan sien of jou pad die regte pad is. Daarom loop ek gereeld op paadjies nog nooit geloop, alleen,” sê Marius Strauss.
Marius se soektog na sy eertydse laerskoolmaatjie van Nababeep, Maureen Engelbrecht, het Suid-Afrika die afgelope week aan die gons gehad.
Dermate dat Strauss 7 000 e-posse, 12 300 kennisgewings en 1 120 vriendskapversoeke op sy Facebook-blad gekry het.
Hy het selfs ’n paar huweliksaanbiedinge gekry en sommige hoop hy en Maureen sal afhaak wanneer hy haar vind. Die huidige mev. Strauss is egter nie hiervoor te vinde nie.
“Ek is ’n gelukkig getroude man met die mooiste vrou op aarde. Sy kyk so mooi na my en soms wonder ek of ek haar genoeg waardeer,” sê hy.
“Ek soek nie na Maureen om enige ander rede nie as om net te weet hoe dit met haar gaan en om te weet waar die lewenspaaie met haar reis heen gelei het.”
Sy vrou help soek, maar wil uit die openbare oog bly.
Die storie uit die hartjie van Namakwaland en die Kalahari oor Marius wat na Maureen soek, het lesers die afgelope week so aangegryp dat sommige op Facebook geskryf het hulle wil nie hul rekenaars verlaat nie vir ingeval hulle iets mis.
En Strauss is op sy e-pos en op Facebook oorval.
“Daar was selfs ’n paar huweliksaanbiedinge, mense wat my boeke wil koop wat ek nie het nie en drie groepe vroue wat wil hê ek moet hulle kom toespreek. Oor wát, dié weet ek nie,” het ’n verleë Strauss die afgelope week gesê.
Hy het vroeg die afgelope week nog gereeld met aanhangers op sosiale media gesels.
Namate sy “rekenaarmasjien” onder die gewig van duisende versoeke en hulpverlenende e-posse begin kreun het, het hy besluit om eerder laataand stil-stil die wye webwêreld aan te durf.
Volgens Strauss soek mense op die sosiale netwerk van so ver as Kanada, Australië, Skotland, Engeland en Nieu-Seeland saam.
Helaas nog geen teken van Maureen nie.
Op eie bodem het Marius en Rapport skole op Upington genader om hul leerlingregisters na te gaan. Een vae leidraad het in ’n doodloopstraat geëindig.
Ou laerskoolmaats van Marius en Maureen het ook hul hulp aangebied deur onder meer genealogie-rekords na te spoor met die minimum inligting wat ’n agterkleinneef van Maureen, Sakkie Engelbrecht van Limpopo, kon verskaf.
Engelbrecht is self op soek na sy niggie. “Asseblief, as julle haar kry, laat my weet,” was sy versoek aan Rapport.
Engelbrecht sê sy ma, wat dalk sou kon help, is drie jaar gelede oorlede.
Sy verswakte pa wat in die Kaap woon, kan nie meer onthou nie.
Johannes Strauss, ook voorheen van Nababeep, vertel: “Dat dit regtig die land aan die praat het, is so. Was Dinsdag en Woensdag by ’n konferensie in die Middelburg/Witbank-gebied en hier hoor ek twee van die dames sit die ding en bespreek. Die enetjie het sommer trane in haar oë gekry.”
Oor dié reaksie sê Marius: “Die mooi in hierdie hele sage is dat mense liefde en vrede soek.”