Nuwe eienaar van kasteel ’n reuse-raaisel
2012-09-22 23:17
Christine van der Westhuizen
Die raaiselagtige Lichtenstein-kasteel teen die hange bo Houtbaai is vir R23 miljoen aan ’n geheimsinnige Russiese sakeman verkoop.
Dit is die hoogste struktuur op Houtbaai se Karbonkelberg en het ’n uitsig oor die hawe in die rigting van Chapman’s Peak.
Nina Smith, ’n eiendomsagent van Sotheby’s, weier om die naam van die nuwe, “baie hoë profiel”-eienaar bekend te maak, buiten dat hy ’n Russiese sakeman is wat nie in Suid-Afrika woon nie.
“Dit is ’n vakansiehuis,” sê sy eers. Voeg dan by: “Nee, dit is slegs ’n private woning.”
Die landgoedbestuurder, Diane Davidoff, wil ook niks sê nie.
Dokumente van die aktekantoor toon ’n transaksie van R23 miljoen wat op 29 Mei vanjaar deur ene Svetlana Besfamilnaya, waarskynlik die Russiese sakeman se vrou, gemaak is.
“Ek sal haar moet inlig dat iemand besig is om rond te krap en haar man sal baie kwaad wees,” sê Davidoff.
Die kasteel is slegs per private toegangspad en helikopter bereikbaar. Dit het 12 en suite-slaapkamers, ’n biblioteek, banketsaal, swembad en ’n helikopterlandingsplek.
Bouwerk aan die kasteel is in 1986 deur die Duitser Reyneir Fritz begin en is in 1998 voltooi. Fritz wou ’n presiese replika van die gotiese Schloss Lichtenstein in die suide van Duitsland bou.
Kort nadat hy en sy gesin ingetrek het, is Fritz egter in die kasteel dood. Die presiese besonderhede van sy dood is nie duidelik nie.
Volgens ’n Houtbaai-inwoner wat die gesin geken het, het Fritz by die trappe afgeval. Sedertdien wil gerugte dat sy gees nog in die kasteel ronddwaal nie gaan lê nie.
Davidoff, wat die laaste sewe jaar in die kasteel woon, lag die spookstories af.
“Hy is aan ’n hartaanval dood nadat die kasteel voltooi is,” sê sy.
Sy weduwee het kort ná sy dood die eiendom verkoop en dit is as ’n gastehuis en vir troues gebruik.
“Dit was baie gewild,” sê Davidoff.
Sy het opdrag van die nuwe eienaars om besprekings vir fliekskote van die kasteel se buitekant te neem, asook vir troues in die konferensiesentrum, wat apart van die huis is.
Soos ander kamma-Europese kastele wat in Afrika deur immigrante vol verlange na hul vaderland gebou is, is die Lichtenstein-kasteel ’n rare gesig teen die hange van die Karbonkelberg.
Die voorsitter van die Houtbaai-belastingbetalersvereniging, Len Swimmer, sê die kasteel moes nooit daar, in die ongereptheid van die natuurskoon, gebou gewees nie.
“Vandag sou hulle nooit goedkeuring gekry het om daar te bou nie, maar destyds was dit makliker. Gelukkig smelt die kasteel en die berg goed saam en het dit, pleks van ’n ontsiering, ’n ikoniese gebou geword.”
Bron: West Cape News