‘Onmenslike’ padvalk in sop
2012-09-09 01:06
Hanri Wondergem in Klerksdorp
’n Vrou van Klerksdorp eis R300 000 van Potchefstroom se stadsraad nadat sy “gewelddadig en onmenslik” hanteer is deur ’n verkeerslid.
Die eis spruit uit ’n voorval op 2 Junie toe Pape Hadebe, die verkeerslid, Hesta Kotze glo met pepersproei in die gesig gespuit het voordat haar voete onder haar uitgeskop is.
Kotze beweer ook Hadebe het met sy knie op haar rug geval voordat sy geboei is. Dit alles terwyl haar pa, Koot de Beer (70), op sy sterfbed gelê het en sy haastig was om by hom uit te kom.
Sy was op 2 Junie van Klerksdorp na Potchefstroom op pad. Volgens Kotze was haar nood- en hoofligte aan toe Hadebe haar wou aftrek. Sy het geweier om te stil te hou.
“Ek het vir hom probeer wys dit is ’n noodsituasie en ek hét by verkeersligte en stoptekens stilgehou. Ek was nie roekeloos nie, maar ek het geweet as ek eers met hom moet praat, gaan ek nie betyds wees om my pa te groet nie.”
Voor die hospitaal het Hadebe haar gekonfronteer. “Ek het hom gesmeek, by hom gepleit om my toe te laat om my pa te sien.”
Daarna het die beweerde voorval gebeur ten aanskoue van verskeie ooggetuies en hospitaalpersoneel wat foto’s en video’s geneem het.
“My pa het gesterf terwyl ek in boeie op die grond gelê het. Niks kan die situasie omkeer of beter maak nie. Die man het net geen genade gehad nie.”
’n Ander verkeerslid het glo opgedaag en Kotze toegelaat om in die hospitaal in te gaan.
“Dit was klaar te laat.”
Kotze was nadat sy haar pa aan die dood afgestaan het drie uur lank in aanhouding.
Die stadsraad en Hadebe het reeds kennis van die eis ontvang.
Kotze dagvaar weens trauma, pyn en lyding.
“Dit gaan nie oor die geld nie, dit gaan oor die beginsel.”
Kotze besef dit kan jare wees voor die saak afgehandel is, maar sy gaan nie terugstaan nie.
“Hy (Hadebe) en die stadsraad moet verantwoording doen en aan die pen ry. Al vat dit jare, geregtigheid moet geskied.”
Kotze sê verder sy sien uit na die dag in die hof as Hadebe sy optrede probeer regverdig.
“Wat hy gedoen het, is totaal en al belaglik. Hy kon my geboei het, dit sou ek verstaan, maar om my so onmenslik te behandel is nie reg nie.”
William Maphosa, woordvoerder van die Tlokwe-stadsraad (Potchefstroom), het bevestig die stadsraad het die kennisgewing ontvang, maar wou nie verder daaroor kommentaar lewer nie.
Maphosa sê daar was in die verlede geen klagtes oor Hadebe nie. Die stadsraad het nie teen hom opgetree nie omdat Kotze nooit amptelik ’n klag ingedien het nie.