Onmin by RSG speel af op web

’n RSG-aanbieder wat dié radiostasie op Facebook gekritiseer het, is deur haar baas op die vingers gewiks – ook op Facebook.

Margot Luyt, ’n jare lange aanbieder van letterkundige programme, het die radiostasie gepak omdat haar programme vir sokkeruitsendings moes plekmaak.

Sy het Donderdag op Facebook geskryf: “Ek het vandag die nuus gekry dat daar nie volgende Dinsdagaand ’n Vers en klank OF Kortom sal wees nie a.g.v. (tromme)... SOKKER!”

Vers en klank is ’n program oor Afrikaanse poësie en in Kortom word Afrikaanse kortverhale voorgelees.

Dit word elke Dinsdag tussen 21:00 en 22:00 uitgesaai, maar is die afgelope week ’n uur lank vertraag.

Dit word boonop eerskomende Dinsdag glad nie uitgesaai nie weens die Afrikanasiesbekertoernooi.

Die TV-draaiboekskrywer Johann Potgieter sê: “Dit lyk my die SAUK is vasbeslote om diegene wat nie klaar sokker verag nie, te oortuig.”

Die sangeres Amanda Strydom: “Verstaan jy nou my frustrasie! Het Dinsdagaand soos ’n zombie gesit en wag vir jou kosbare program wat toe oplaas 22:00 uitgesaai is. Dit was fantasties.”

Luyt het luisteraars aangemoedig om te kla: “Julle ken RSG se webwerfadres.”

Dis toe dat Magdaleen Kruger, RSG-hoof, van haar laat hoor het: “Margot, dit sal nogal gaaf wees as jy ’n bietjie wyer dink en laat leef as jou eie programme en minder selfgesentreerd is. “Daar’s meer sokker-aanhangers as Vers en klank-aanhangers.”

By navraag het Kruger gesê sokker tel onder die vyf gewildste sportsoorte op RSG. “RSG se sokkerkenner en -kommentator Johann Russouw het baanbrekerswerk gedoen om Afrikaanse sokkerterme te skep, waarvoor hy bekroon is – dis ’n groot pluimpie vir Afrikaans.”