Ons maak gode en kyk hoe hulle val
2013-02-17 00:11
Wanneer Nathi Mthethwa, minister van polisie, later vanjaar die jaarlikse misdaadstatistieke bekend maak, sal Reeva Steenkamp se moord swart op wit in die “moord”-kategorie van die Boschkop-polisiekantoor in Pretoria aangeteken staan.
Wat moord betref, sal dié kantoor weer een van die land se “uitblinkers” wees.
Want in ’n land waar jaarliks 16 000 mense vermoor word, sal Boschkop – wat die gegoede Silver Woods-landgoed en omringende uitsoekbuurte insluit – waarskynlik minder as tien moorde vir 2012-’13 aanteken.
Verlede jaar het sewe mense hul lewe in dié polisiekantoor se diensgebied verloor.
Net ’n paar kilometer weg, in Mamelodi-Oos, het die polisiekantoor daar verlede jaar 50 moorde aangeteken, drie minder as in 2011.
Ironies genoeg is Oscar Pistorius na die Mamelodi-hospitaal geneem vir bloedtoetse en sodat die distriksgeneesheer hom vir moontlike beserings kon ondersoek.
Die Mamelodi-hospitaal is nou nie juis ’n plek waar Pistorius dikwels gesig sou wys nie.
Hy, en waarskynlik al sy bure in Silver Woods en aanliggende buurte, kan private hospitale en klinieke in die stad bekostig.
Maar Donderdag het Pistorius se wêreld van weelde met blink motors en handelsnaamsonbrille ineengestort.
Binne ’n oogwink het die Nike-geïnspireerde fasade van Suid-Afrika se goue seun verdwyn.
Skielik was hy Oscar die verdagte, met ’n grys keps oor die kop om sy beroemde gesig te verberg, en op die agtersitplek van ’n nederige Volkswagen Polo wat deur onderbetaalde polisielede bestuur word.
By die aanklagkantoor sou hy tevrede moes wees met die binnekant van ’n vaal polisiekantoor, op wit plastiekstoele (indien enige) sit en verklarings met ’n Bic-pen skryf.
Dit gebeur gereeld dat rykes se lewens met dié van die res in aanraking kom deur misdaad. In Suid-Afrika het ons gewoond geraak aan die stereotipe van die arm, swart misdadiger.
G’n wonder nie dus dat almal so maklik kon glo dat hy (volgens vroeë berigte) op ’n inbreker losgebrand het.
Middelklas-Suid-Afrikaners bestee elke jaar miljoene rande aan private veiligheidsmaatreëls soos elektriese heinings, valbome en alarmstelsels om die vyand buite te hou.
Ons is dus verbaas wanneer Mthethwa (of sy voorgangers) bekend maak dat sowat agt uit elke tien moordslagoffers in ons land vermoor word deur iemand wat hulle ken.
Ons weet nou dis ’n leuen dat die blink wêreld van sport, geld, mode en skoonheid verhewe is bo wreedheid.
Maar dié leuen is ’n multimiljoenrand-bedryf wat lewend gehou word deur ons almal wat so graag gode skep, net om hulle keer op keer te sien val.