Op 'n mespunt
2012-12-16 01:28
Lizel Steenkamp, Llewelyn Prince en Sune Kitshoff
Die ANC se nasionale konferensie kan ontspoor nog voordat dit behoorlik op dreef is.
Die party se nasionale uitvoerende komitee (NUK) het gisteraand ná ’n marathon-noodvergadering in die Mangaung-burgersentrum besluit die Vrystaat se afvaardiging van 324 lede, wat ondersteuners van pres. Jacob Zuma is, sal wel in môre se leiersverkiesing kan stem.
Dit is in weerwil van beswaarde Vrystaatse ANC-lede se dreigemente om ’n dringende hofinterdik te bekom om die Vrystaters die konferensie te belet.
Die 19 lede van die Vrystaatse provinsiale uitvoerende komitee (PUK) is egter wel van die konferensie uitgesluit nadat die konstitusionele hof Vrydag beslis het die Vrystaatse leiersverkiesing in Junie was ongeldig.
Van dié leierskap sal slegs Ace Magashule, die premier, die konferensie as stemgeregtigde bywoon omdat hy terselfdertyd lid is van die ANC se NUK.
’n Senior ANC-lid het aan Rapport gesê die NUK se besluit kan die konferensie op die eerste dag al laat ontspoor.
“Al die prosesse by die konferensie moet geldig wees, volgens regsgronde en op politieke vlak. Daar mag geen twyfel daaroor wees nie. Dit kan die geldigheid van die hele konferensie, van die leiersverkiesing tot die beleidsbesluite, in gedrang bring,” het die lid aangevoer.
Wat ’n soomlose herverkiesing vir Zuma moes wees, het weens die konstitusionele hof se uitspraak ’n krisis geword.
Die ANC se topleiers het die onverwagse verwikkeling teenoor die media onderspeel, maar ’n senior ANC-lid het erken dit gaan die agenda vir die volgende paar dae oorheers.
Die Vrystaatse beswaardes wat adj.pres. Kgalema Motlanthe ondersteun, het die afgelope twee dae gedreig hulle gaan die konferensie vandag ontwrig as die Vrystaatse afvaardiging mag stem.
Hulle gaan die kwessie vanmiddag tydens ’n geslote sessie opper om die afvaardiging se deelname tersyde te stel.
Misluk dít, “sal ons teruggaan hof toe om ’n interdik te kry om hulle die konferensie te belet”, het ’n ingeligte gesê.
Die vreugdevure het ná eergister se hofuitspraak hoog gebrand.
Rapport het verneem jubelende Motlanthe-ondersteuners het in kavalkades deur kleiner dorpe gery en op hul toeters gedruk.
Hulle was onder die indruk die Vrystaatse afvaardiging sou nie meer in die leiersverkiesing mag stem nie.
Die Motlanthe-faksie voer aan die Vrystaatse PUK het ’n hand gehad in die benoemingsproses van die Vrystaatse takke om te verseker die “regte mense” stem.
Daarom glo hulle al die Vrystaters moet uitgesluit word Lede van dié faksie het Vrydag by ’n kuierplek in Bloemfontein hul opvolgstrategie bespreek.
Hulle was woedend oor Gwede Mantashe se aandrang daarop dat die Vrystaters ondanks die hofuitspraak mag stem.
“Wie is Gwede? Hy is net ’n rotsbooroperateur. Hy is nie ’n regsgeleerde nie,” is aan Rapport gesê.
Die einste Mantashe het vroeër gemaan die ANC kan lede skors wat die party hof toe sleep.
Maar die pro-Motlanthe-Vrystaters voer aan hulle is juis hof toe omdat Luthuli-huis hul besware nie objektief gehanteer het nie.
“Hoe kan ons Gwede vertrou? Hy behoort dan self aan die Zuma-faksie,” is aan Rapport gesê.
’n Senior lid van die ANC in Gauteng wat Zuma as partyleier wil ontsetel, het gister gesê “elke stem tel” – en word die Vrystaatse afvaardiging by die konferensie uitgesluit “kan dit ’n beduidende invloed hê” op die uitslag van die leiersverkiesing.
Die verkiesingskommissie sal vanaand bekend maak wie hul benoemings vir die ANC se ses topleiersposisies aanvaar het.
Afgevaardigdes sal dan weet of Cyril Ramaphosa beskikbaar is vir die adjunkleierspos.
Motlanthe het hom reeds verkiesbaar gestel vir drie posisies: ANC-leier, adjunkleier en as NUK-lid.