Oppas vir dié 'hubbly bubblies'

KAAPSTAD. – Die nuwe gier onder kinders en tieners om waterpype (hubbly-bubblies) te rook, hou ernstige gevare van kanker in.

Boonop besef ouers en kinders nie die gevare nie omdat die gegeurde tabak wat gebruik word – soos allerlei vrugte-, sjokolade- en vanieljegeure- – strelend voorkom.

Prof. André van Zyl van die skool vir tandheelkunde aan die Universiteit van Pretoria het gesê ouers koop selfs uit onkunde dié waterpype vir hul kinders. ’n Mens sien die tipe waterpype oral op tafels op kampusse en by skoolpartytjies.

Van Zyl het op ’n nuuskonferensie van die Suid-Afrikaanse Tandheelkundige Vereniging (Sada) in Kaapstad gewaarsku kinders van so jonk as agt tot jong mense van 24 jaar is die meeste kwesbaar vir die kankergevare van die pype.

“Dit is gevaarliker as sigarette. Mense asem die rook dieper in omdat dit sulke strelende, gegeurde tabak is. Hulle rook ook vir langer tye aaneen,” het Van Zyl gesê.

Juis omdat waterpype vir lang tydperke gerook word, kan gifstowwe gelyk aan dié van ’n honderd sigarette ingeasem word.

Daar word ook verkeerdelik aangeneem die water in die pype filtreer gevaarlike stowwe uit.

“Dit is heeltemal verkeerd. Die rook van ’n waterpyp bevat nikotien, teer en metale.”

Verder is daar ook die gevaar dat mense wat dieselfde mondstukke deel virusse soos herpes, hepatitis en tuberkulose kan versprei. Jonger mense word met die gebruik van die waterpype blootgestel aan ’n groter risiko om mond- en keelkanker te kry.

“Daar moet nog baie navorsing gedoen word oor die spesifieke gevare met die gebruik daarvan, maar in dié stadium moet veral jong mense bewus wees van die gevare wat dié gier inhou.”

- Die Burger

* Volg Rapport op Twitter en Facebook