Opponente nou tromp-op geloop oor skolegodsdiens
2009-10-17 22:48
Die stryd teen godsdiens in skole word nou amptelik. Die Afrikaanse Vrydenkersbeweging (AVB) wil vandeesweek die regsargumente publiseer wat hulle wil gebruik in hul beoogde hofsaak teen skole wat wederregtelik godsdiens in klastyd beoefen – en die leiers van dié groep het begin om hul opponente (ook in skole) tromp-op te loop.
Mnr. Hans Pietersen, voorbok, het selfs Woensdag onaangekondig by ’n skool, die Hoërskool Diversity in die suide van Johannesburg, ingeval om ’n onderwyser oor godsdiensbeoefening te konfronteer.
Mnr. S.P. Grové van dié skool het vroeër op ’n internetforum verklaar “geen vak kan sonder die Bybel gegee word nie” en Pietersen, asook prof. George Claassen van Skepties Suid-Afrika, uitgedaag om in sy klas met hom te kom gesels.
Pietersen is gevolglik na die skool toe om Grové voor te lê, maar die fut was gou uit dié beoogde konfrontasie toe dit blyk dat Grové eintlik heel vriendelik is en dat die Hoërskool Diversity moeite doen om godsdienstige pluraliteit te akkommodeer.
Toe is Pietersen vort na sy volgende konfrontasie. Eers het hy met mnr. Jaco Kleynhans van die vakbond Solidariteit (uitgesproke voorstanders van godsdiensbeoefening op skool) gesels. Daarna het hy probeer om ’n vergadering met die VF+, nog ’n verklaarde opponent, te belê.
Dít alles terwyl die pogings van die voorstanders van skolegodsdiens ook versnel. ’n Tweede Wêreldbiddag vir God in Skole word Dinsdag gehou, weer gereël deur die Oos-Kaapse tiener Jessie Bester, wat soos ’n wafferse jong Angus Buchan telkens ’n paar duisend siele werf.
Op Jessie se eerste biddag het sowat 6 000 mense landwyd (en in sommige gevalle oorsee) saamgebid.
Dinsdag, wanneer ondersteuners tussen 19:00 en 19:10 die hoofde buig, verwag hy meer as 13 000 saambidders. Dit is die getal lede van sy internetgroep “Christenskap sal in skole aanbly – come hell or high water”. “En wanneer ons Wêreldbiddag vir God in Skole 3 hou, wil ons 30 000 tot 40 000 saambidders hê,” sê dié 18-jarige CSV-voorsitter van die Hoërskool Nico Malan in Humansdorp.
Jessie moes tydens skoolpouse met Rapport praat, want benewens die veldtog en radio-onderhoude die laaste twee weke moet hy boonop klasloop en vir sy matriekeindeksamen studeer.
Die AVB het intussen ook van die gebedsaksie kennis geneem. “Ons weet van die groot biddende veldtog teen ons,” sê Pietersen. “Maar ons sien nog nie die gevolge daarvan nie.”
Die argumente vir die AVB se beoogde hofsaak sal glo van die komende week af op hul webwerf (www.hulle.co.za) verskyn.
Op dieselfde webwerf het ’n lys van 43 topskole landwyd verskyn wat van nader bekyk gaan word om seker te maak skriflesing en gebed vind nie in klastyd plaas nie.
- Rapport