Ouma wou man skiet wat tiener wou verlei
2012-08-18 23:49
- Artikelopsies
- Deel
- Kry Rapport op
’n Vrou het in die landdroshof in Nelspruit verskyn nadat sy ’n man (24) probeer skiet het wat met haar kleindogter (16) seks wou hê.
Die vrou en die man is albei verlede Vrydag in hegtenis geneem en sy het die afgelope week in die hof verskyn.
Die man is vrygelaat omdat hy nie die Kinderwet oortree het nie, het Jacques Meiring, operasionele hoof by Bossies Justice, ’n Nelspruitse veiligheidsmaatskappy, gesê.
“Die meisie is ouer as 16 en dus is daar geen statutêre verkragtingsaak nie.”
Die kleindogter was ook nie onwillig om met die man seks te hê nie.
Bossies Justice en die polisie is na die toneel in Valencia ontbied.
Volgens Meiring het die vrou uitgevind die man beplan om by haar kleindogter te slaap en sy het hom toe met haar vuurwapen gedreig.
“Die vrou word vervolg ingevolge die Vuurwapenwet en weens nalatige hantering van ’n vuurwapen. Sy het die skietding in haar besit gehad, maar die lisensie het lankal verval.
“Die kluis waarin sy die vuurwapen gehou het, was ook nie vas teen die muur nie, soos dit in die Vuurwapenwet vereis word.”
Die vrou se naam word weerhou om die kleindogter se identiteit te beskerm.