Pa kry ná vyf jaar ontvoerde kinders terug uit Frankryk
2012-09-29 23:27
’n Kaapse pa se geveg van vyf jaar om sy “gesteelde” kinders terug te kry, is gister beëindig toe hy met hulle uit Frankryk in Suid-Afrika aangekom het.
Steve Swanepoel van Somerset-Wes se dogter (10) en seun (9) is Vrydag ná skool in Frankryk ingewag, waarna hulle na sy hotelkamer gevat is.
Hulle het later die aand saam met hul pa na Suid-Afrika vertrek – sonder hul ma, Charlotte de Montby Isenschmid, wat beweer sy is van die Franse adelstand.
Sy en die kinders het Suid-Afrika op 28 Maart 2007 verlaat onder die voorwendsel dat sy by haar Franse familie gaan vakansie hou. Sy het drie bevele van Franse howe dat sy die kinders na Suid-Afrika terugbring, verontagsaam.
De Montby Isenschmid het ’n Franse en Switserse paspoort en Suid-Afrikaanse burgerskap. Die kinders het Suid-Afrikaanse en Switserse paspoorte.
Saterdagmiddag het Swanepoel se regsverteenwoordiger, Megan Harrington-Johnson van Schindlers-prokureurs in Johannesburg, gesê sy is oorstelp dat Swanepoel ná ’n “reusagtige geveg wat internasionaal opslae gemaak het, uiteindelik die Franse owerhede kon dwing om sy twee kinders aan hom terug te besorg”.
Volgens haar het Swanepoel drie dae gelede na Frankryk gevlieg. Die Franse span wat die kinders by die skool gaan haal het, het ’n gespesialiseerde sielkundige ingesluit wat in die hotel met die kinders en hul pa gepraat het voordat hulle die terugtog aangepak het.
“Schindlers sal nou ’n dringende aansoek bring om tussentydse toesig aan Steve toe te staan, in afwagting op die bevinding van die hoofgesinsadvokaat.”
Van Swanepoel se klagtes sluit in dat die kinders se Engels verwaarloos het “en sy het selfs die seun se naam verander. Sy het dit so bewerkstellig dat mnr. Swanepoel sy kinders net kon sien as hy op eie koste na Frankryk gereis het.
“Sy ouer kinders (18 en 16) uit ’n vorige huwelik is ook gekeer om met hul sibbe kontak te maak. Die hele gesin is uitmekaargeskeur.”
Swanepoel het ook toesig oor dié twee kinders.
Dit het ’n diplomatieke kwessie geword, sê Harrington-Johnson, “omdat die Franse owerhede nie toegesien het dat die hofbevele uitgevoer word nie.
“In wese beteken dit dat hulle die ontvoering van twee kinders goedgekeur het.”
Swanepoel het gistermiddag aan Rapport gesê: “Die kinders is rustig, maar ons emosies loop oor. Ek hoop ek en hul ma kan nou rustig iets uitwerk.”