Padslagting: ‘Owerheid laat slaplê’
2013-01-05 23:22
Terwyl dié feestyd se padsterftesyfer waarskynlik die hoogste in die land se geskiedenis gaan wees, is rolspelers woedend oor die owerheid se mislukking daarin om die slagting op Suid-Afrika se paaie te keer.
Teen gister was die voorlopige sterftesyfer vir die 2012-’13-vakansietyd volgens die Padverkeerbestuurskorporasie (RTMC) 1 300, maar kenners maan die uiteindelike syfer gaan waarskynlik verlede jaar se rekordsyfer van 1 771 oortref.
Die uiteindelike syfers word eers in Maart uitgereik wanneer die syfers van terugkerende vakansiegangers, alle ongelukke en latere sterftes bygereken is.
“Die RTMC sê daar skort niks met wetstoepassing nie en die probleem lê by motoriste se gedrag, maar só weerspreek hy homself,” sê Howard Dembovsky van die Justice Project South Africa. “As hy sy werk gedoen het, sou mense nie soveel verkeersoortredings kon begaan nie.”
Dembovksy sê die houding van Collins Letsoalo, die RTMC se uitvoerende hoof, jeens die padslagting moet reggestel word.
“Letsoalo sê daar is nie ’n gebrek aan wetstoepassing nie, maar vra enige motoris wanneer laas hy of sy weens ’n bewegingsoortreding afgetrek is.”
Dembovsky is woedend omdat die land se 17 000 verkeersbeamptes in die feestyd volgens hom net 32 motoriste weens roekelose of nalatige bestuur aangekeer het.
Hy meen die owerheid se benadering tot wetstoepassing gaan die skokkende sterftesyfer nie laat afneem nie. “Verkeersbeamptes sit óf in bosse en neem foto’s óf hulle stel padversperrings op; daar is geen poging om aggressiewe bestuurdersgedrag vas te vat nie.”
Motoriste wat op gevaarlike plekke verbysteek; van baan verwissel sonder om hul flikkerlig te gebruik; en nie by stoptekens stilhou nie, word bykans nooit aangekeer nie, het Dembovsky beweer.
Rob Handfield-Jones, ’n verkeerskenner wat vroeër aan die Automobiel-Assosiasie verbonde was, sê die RTMC versuim sedert 2006 om belangrike inligting oor noodlottige padongelukke beskikbaar te stel.
“Die sterftekoers per 100 miljoen voertuigkilometer (MVK), ’n belangrike maatstaf om vordering of agteruitgang te meet, is in 2006 laas in die RTMC se jaarverslag aangedui,” s Handfield-Jones. Die koers was toe 11,75 MVK, byna dubbel van 1998 se 6,8 MVK.
Handfield-Jones raam die koers trek nou by tussen 18 en 20 MVK. “As ons MVK-koers gelykstaande aan dié van die VSA was, sou ongeveer 600 mense per jaar op ons paaie gesterf het.”
Die RTMC se padsterftesyfer vir die boekjaar 1 April 2010 tot 31 Maart 2011 is 13 802. Dit is onbekend wat die syfer vir 2011-’12 is.
Ashref Ismail, die RTMC se woordvoerder, het die afgelope week ontken die feestyd se sterftesyfers styg jaarliks. Toe Rapport die RTMC se syfers aanhaal, het Ismail gesê sy kollegas doen hul bes om padsterftes te voorkom. “Diegene wat ons kritiseer, het nog nie tussen die bloed van padslagoffers gewerk nie.”
Volgens hom behels die RTMC se verkeersplan onder meer ’n teiken van 20 000 toetse vir dronkbestuur elke maand, asook die aftrek van een miljoen voertuie per maand om lisensies en voertuie se padwaardigheid na te gaan.
Ismail het ontken die RTMC doen te min om oortreders vas te vat. “Ons doen ons deel, maar daar is motoriste wat nie hul deel doen nie. Ons kan nie mense teen hulself beskerm nie.”