Party burgemeesters het tot 7 lyfwagte elk
2012-01-28 23:10
- Artikelopsies
- Deel
- Kry Rapport op
Loyiso Sidimba in Johannesburg
Sommige burgemeesters het tot sewe lyfwagte en alles kom uit die belastingbetaler se sak.
Mnr. Kgosientso Ramokgopa, Tshwane se burgemeester, het sewe lyfwagte.
Me. Maphefo Mogale-Letsie, burgemeester van Merafong, wat Carletonville en Khutsong insluit, het vier lyfwagte.
Me. Zukiswa Ncitha, Buffalo City se burgemeester, het ook vier. Dit kos die Oos-Kaapse belastingbetaler jaarliks meer as R1,1 miljoen.
In Mbombela, waar speaker Jimmy Mohlala drie jaar gelede vermoor is, het me. Cathy Dlamini, die burgemeester, talle personeellede wat haar beskerm.
Dlamini se huis word ook opgepas. Ander raadslede word bewaak deur private veiligheidsfirmas wat deur die raad betaal word. Dit het hul uitgawes vir private veiligheid van sowat R7,3 miljoen in 2010 tot meer as R11,3 miljoen verlede jaar opgestoot.
Burgemeesters mag die provinsiale polisiekommissaris nader vir veiligheid en die rade moet selfs die veiligheidsmaatreëls instel.
Selfs voormalige burgemeesters kan bewaak word as dit as noodsaaklik beskou word.
Kapt. Dennis Adriao, polisiewoordvoerder, wou nie kommentaar lewer nie.