Pasop wat jy kwytraak

Weerhou jouself daarvan om lasterlike uitlatings oor Oscar Pisto­rius op sosiale media te maak.

So waarsku regslui Jan Alleman wat hul mening oor die moord op Reeva Steenkamp lukraak op onder meer Facebook en Twitter stel.

Regslui is dit eens dat enige lasterlike uitlatings wat Pistorius se eer en waardigheid op enige platform aantas, kan lei tot klagte van crimen injuria en/of lastereise.

André Grobler, ’n prokureur, sê tans hardloop mense se emosies baie hoog en dit oorheers hul denke.

“Al het Pistorius haar geskiet, maak dit hom nie skuldig of ’n moordenaar nie,” sê Grobler.

Dr. Llewellyn Curlewis, nog ’n prokureur, sê Suid-Afrika het reeds gevalle gehad waar mense strafregtelik vervolg is weens lasterlike aanmerkings op Facebook.

“Dit is veiliger om jou kommentaar vir jouself te hou en nie deel te neem aan skinderstories nie.

“Weens Pistorius se internasionale status is die skade aan sy beeld ook soveel groter as vir Jan en alleman.”

Wessie Wessels, ook ’n prokureur, wys daarop dat pres. Jacob Zuma onder lasterlike uitlatings deurgeloop het toe hy van verkragting aangekla is.

“Zuma het erken hy het seks gehad. Dit het nie van hom ’n verkragter gemaak nie. Hy is later vrygespreek.”

Volgens hom is Pistorius weens sy hoë profiel uitgelewer aan leke wat nie weet hoe die reg werk nie. – Sonja Carstens