Patricia gee vet op DVD teen gewig
2013-01-05 23:23
- Artikelopsies
- Deel
- Kry Rapport op
Gavin Prins in Johannesburg
Dans! Dans! Dans!
Dans daai onwelkome vetrolle wat die Desember-vakansie op jou kurwes aangepak het, weg.
Dis wat Patricia Lewis, Supersterre-aanbieder, gedoen het. Nadat sy vir drie jaar met haar gewig gesukkel het, het sy met ’n oefenprogram gebasseer op Zumba-danse, 11 kg verloor.
Nou is haar nuwe DVD, Voooma, op die rak waarin sy haar geheime vir ’n fietser lyfie met die publiek deel.
Voooma is gebasseer op die Suid-Amerikaanse oefenprogram Zumba.
“Ek het Zumba gevat en ’n Suid-Afrikaanse danspassies daarby gesit. Ek het agt partytjie liedjies laat opneem. Daar is boere- en Zoeloe-danse, so ietsie vir almal,” sê Patricia.
Haar DVD bestaan uit drie dele: danspassies wat kykers kan uitvoer, wenke oor koskeuses en fiksheidsinstruksies van die bekende Jenni Rivett wat eens Prinses Diana se fiksheidsinstrukteur was.
Nadat Patricia vroeer ses gewasse op haar skildklier gehad het, het sy lank gesukkel met haar gewig. “Ek het alles probeer. Ek het kilometers ver gehardloop en myself probeer uithonger om die kilo’s te probeer afskud. Ek sou ’n diabeet word as ek nie drasties ’n plan gemaak het nie.
“Toe ontmoet ek vir Jenni wat uit Londen Durban toe getrek het. Ek het die kilo’s net so afgeskud met haar klasse. Ek het toe besluit om my eie DVD te doen,” vertel Patricia.
“Ek was my hele lewe lank maer en vir drie jaar lank oorgewig. Dit was die moeilikste tyd van my lewe. Ek wil dit nooit weer beleef nie.”
“Dit is ’n pret-DVD en dit voel asof jy by ’n partytjie is. Dis nie moeilike oefeninge nie.”
Sy erken dat sy hierdie feestyd drie kilogram gewig aangesit het. “Ek kon nie my man (Mark Whitfield) se heerlike kalkoen, gebraaide aartappels en poedings weerstaan nie. Om nie eens van sjokolade te praat nie,” lag sy.
Maar, sê Patricia, met Voooma behoort sy die kilo’s binne ’n week weer af te skud.