Philip, Susan leef nou ‘volkleur’-lewe ná egskeiding
2012-09-09 01:06
- Artikelopsies
- Deel
- Kry Rapport op
AJ Oppperman in Johannesburg
Die akteurspaar Philip Moolman en Susan Coetzer is geskei ná ’n huwelik van 13 jaar.
Moolman was voorheen met die aktrise Anna-Mart van der Merwe getroud. Coetzer se huwelik met Moolman was haar vierde. Sy was voorheen met die akteur Frank Opperman getroud.
Coetzer, ook bekend vir haar geestelike boeke en praatjies landwyd, het ongeveer twee weke gelede ’n praatjie in Pongola, KwaZulu-Natal, gehou.
Sy het die gehoor vertel sy is twee dae vantevore geskei. Een van die gaste sê: “Susan het gesê sy voel lankal sy is teen ’n muur in die huwelik. Sy het vir Philip vertel hoe sy voel, en toe sê hy hy voel presies dieselfde.”
Dit het die mense verstom gelaat, het die gas gesê. “Sy het ook vertel van sy depressie.”
Moolman het aan Rapport bevestig hy en Coetzer is geskei.
“Dit is vir my ’n bevredigende reis. Ons is nie kwaad vir mekaar nie. En dit doen ons albei goed, want nou kan ek al my aandag aan ons restaurant gee en sy kan al haar aandag aan haar optredes gee.”
Hulle het tien jaar gelede ’n teaterrestaurant, Die Blou Hond, in Linden, Johannesburg, begin en besit dit steeds gesamentlik.
Hy het vroeër vanjaar erge depressie beleef. “’n Vriend van my het byna verdrink. Hy was lank daarna in ’n koma. Ek het reeds uitgebrand gevoel oor werkdruk by die restaurant – admin in die dag, optree in die nag – en ek is in ’n kliniek opgeneem en het ’n tyd lank medikasie ontvang.”
Dit is nou verby. “Ek is in die beste tyd van my lewe en het vreugde en dankbaarheid. En wil net die beste vir Susan hê.”
Coetzer het Vrydag op haar Facebook-blad geskryf sy was platgeslaan van skok, maar dat sy nou haar nuwe lewe in volkleur wil leef “met my ware standvastige, ewig betroubare Bruidegom”.